Miss Universe Aruba Thessaly Zimmerman a haci donacion di su trahe cultural na museo di Aruba Aloe

ORANJESTAD (AAN): Aña pasa, Aruba Aloe orguyosamente a patrocina Thessaly Zimmerman y su trahe cultural pa su participacion na e concurso di Miss Universe 2021 na Israel, dia 12 di December.  

    Como parti di e colaboracion aki, Thessaly a haci donacion di su trahe nacional na e museo di Aruba Aloe durante un conferencia di prensa, cual a tuma luga na nan facilidad na Hato ariba diaranson, 19 di januari, 2022.

            Durante di e conferencia di prensa, Thessaly a comparti su experiencia na e concurso di Miss Universe representando nos isla y compartiendo un parti asina importante di Aruba su historia y cultura cu resto di mundo a traves di su trahe simbolisando Aruba su Aloe.

            Thessaly a extende un danki special na Richard Ramirez, diseñador y creador di e bisti, Andrew Curiel, su makeup designer, Julio Andrews, kende a bin cu e tema pa e trahe, George Bislip pa yud'e haya e paña na ora pa e certamen, Kuro Muller su fotografo y Star Promotion y nan directora nacional, sra. Anouchka Koolman, pa nan tremendo apoyo. Tur e personanan aki a hunga un rol clave den haci e bisti aki un realidad.

            Thessaly a enfatisa cu Aruba Aloe ta un di e poco companianan cu a kere den dje, y cu e ta inmensamente agradecido na e sosten firme aki. Tambe el a menciona cu e tin planea di sigui traha cu Aruba Aloe den un futuro cercano.

            Aruba Aloe su Director Ehecutivo, Dr. Koos Veel M.D., a expresa con orguyoso Aruba Aloe ta di Thessaly y su logro. Tambe el a enfatisa ariba e importancia di e donacion di e trahe pa e museo di Aruba Aloe, splicando con e ta conmemora Thessaly su tremendo papel como embahadora di Aruba, y specialmente e rol cu el a hunga den comparti e storia y significado di Aloe Vera pa Aruba y con el a forma parti di nos historia y cultura.

            Durante di e conferencia di prensa diaranson, Dr. Veel a comparti tambe, “Door di exhibi e trahe aki den nos museo, nos por sigui comparti e storia di Aloe Vera na Aruba cu nos futuro bishitantenan.”            El a invita un y tur pa pasa na e museo y fabrica pa tuma un tour, cual ta gratis, y admira e ultimo adicion aki na e exposicion. Durante di e bishita aki tambe lo por siña mas di e storia di nos “Isla di Aloe” y e productonan di Aruba Aloe.