DEN HAAG: E siman aki e dama Racheline Concincion di 30 aña di edad kende a ser hinca mata den presencia di su yiu muher chikito di 7 aña, tin su raiznan na Curacao. El a wordo hinca mata door di su ex-pareha.
E caso aki a socede na Abbenbroek na Hulanda, y Racheline ta traha como Stewardess pa KLM.
E agresor ta procedente di Belgica, y despues di a comete e crimen, el a drenta auto y a bay na un viaducto riba e highway A15 y a bula di esaki, den un intento di comete suicidio. Aki pa colmo un auto cu tabata pasando aya abao tambe a pasa dal e, y den estado grave el a ser hiba pa Hospital.
Awe Diasabra, Racheline lo wordo crema cu maximo 100 persona presente, segun famia a laga sa. Nan a crea un pagina special riba Internet pa recorda Racheline, y nan a usa e potret aki.
Di e agresor, no tin hopi informacion. For di varios comentario riba social media, ta parce cu e homber tambe tin raiz Curasoleño, aunke esey no a wordo confirma. Ta parce cu e homber no kier a acepta cu e relacion di dje cu Racheline algun siman pasa a yega su fin.
