Miss Universe Andrea Meza kizas lo por perde su corona

MIAMI: Andrea Meza di Mexico kende aworaki ta Miss Universe 2020, ta meti den un escandalo nobo, despues cu e nomber di su supuesto ciruhano plastico a bira conoci,

y esey ta tambalea y pone su reinado y titulo den riesgo.  Un diputado femenino su ‘boca a slip’ na Mexico, y a relaciona Andrea Meza awor cu un practica prohibi den e certamen di beyeza.

   Tur cos a cuminza ora cu e Presidente di Partido Politico PAN na Chihuahua (Mexico), esta Rocío Reza Gallegos, a sigura tur hende cu su ruman homber, esta Dr. Rogelio Reza, ta supuestamente e ciruhano plastico di Andrea Meza.

   “Mi ta comparti cu boso e informacion cu mi ruman ta e ciruhano di Miss Universe Andrea Maza, kende orguyosamente ta representa nos como Chihuahuense rond mundo cu su beyeza,” e dirigente politico a skirbi riba Facebook.  El a share un post cu su ruman a pone hunto cu Andrea Meza.  Riba e potret bo por mira e ciruhano Reza, Andrea, y un otro muher.

   “Ki gusto pa mi di por a saluda Andrea.  E ta sigui di ta asina senciyo y autentico manera desde cu mi a conoce,” el a skirbi ora di a share e imagen di e Docter.

   Hendenan a keda boca habri y mesora a cuminza inunda Facebook cu mensahenan ofensivo contra e ciruhano y e politico, tildando nan di kier probecha di e fama di e dama Mexicana aki.

   Ora e Politico a ripara ta ki barco el a pega, el a core kita (‘delete’) e mensahe for di Facebook, pero toch hopi hende riba Internet a logra di screenshot esaki, y mesora hendenan a cuminza lanza nan opinion, y aki e grupo a bira hopi dividi.

   Algun a critica con e politico Rocío Reza a haci e comentario imprudente ey, otronan ta exigi pa kita e corona di Andrea, pasobra cirugia plastico ta prohibi den certamennan di beyeza, segun e website 800Noticias.

   E certamen di Miss Universe tin totalmente prohibi cu e candidatanan a yega di haci cirugia estetico, pasobra e lo duna nan un ventaha inhusto den e certamen.

   Ni dos luna pasa Andrea Meza a haya e corona ey riba su cabez na Hollywood (Florida) durante certamen di Miss Universe.  Apesar di e tempo cortico, e modelo Mexicano a pasa caba den varios parti di polemica desde cu el a involucra su mes cu e certamen di beyeza internacional aki.

   Na comienzo, hendenan a cuminza bisa cu e ta yiu muher no-reconoci di Ana Gabriel, tambe cu e reina tabata casa den secreto, y awor ta esun aki cu e tin un ciruhano plastico cu a opera riba dje.

   Kizas e siman aki lo bay tende mas di e organizadornan di Miss Universe.