Banco Central ta mustra cu tabatin un demanda reduci pa credito na consumidor den April 2021

ORANJESTAD (AAN):  Durante e reunion di 8 di juni 2021 y despues di a revisa dato economico y monetario mas recien, e Comite di Maneho Monetario (CMM) di Banco Central di Aruba (BCA)

a dicidi pa mantene e porcentahe actual di e tasa di e “reserve requirement” (reserva rekeri) na 7,0 porciento. 

            E tasa di e reserva rekeri ta e cantidad minimo di reserva cu banconan comercial mester mantene na BCA y ta igual na 7,0 porciento di nan obligacionnan cu ta vence den menos di 2 aña. A considera e siguiente informacion y analisis pa yega na e decision aki. 

Reservanan internacional

            E reservanan internacional (incluyendo e diferencia di revaluacion di oro y reserva di divisa) a aumenta cu Afl. 248,1 miyon, te cu y incluyendo 21 di mei 2021, compara cu fin di december 2020. E aumento aki ta debi principalmente na sosten di likides na gobierno di Aruba di gobierno Hulandes y entradanan mas halto relata na turismo.

            Reservanan oficial di divisa a nota un subida di Afl. 98,3 miyon. Consecuentemente, e reservanan oficial y e reservanan internacional a yega te na, respectivamente, Afl. 2.306,2 miyon y Afl. 2.604,7 miyon riba 21 di mei 2021. Di e manera aki e reservanan a keda na un nivel adecua ora di compara nan cu e nivel critico di 3 luna di pago registra ariba cuenta coriente y e metrico di ARA[1] di IMF (Grafico 1). 

Graifico 1 – Desaroyo den reservanan oficial y internacional. 

Desaroyonan den credito

            Den april 2021, credito total a baha cu Afl. 44,2 miyon of 1,1 porciento te na Afl. 3.920,0 miyon, compara cu fin di 2020. Esaki ta debi na e componentenan ‘fiansa na individuo’ (-Afl. 25,1 miyon of -1,3 porciento), ‘fiansa na empresa’ (-Afl. 14,3 miyon of -0,9 porciento), y ‘otro’ (-Afl. 4,9 miyon of -0,9 porciento).

            E categoria ‘fiansa na individuo’ a cay pa motibo di un demanda mas abou pa credito na consumidor y na un menos grado debi na un caida den hipoteca pa cas. Mientrastanto, e componente ‘fiansa na empresa’ a mengua a causa di fiansa riba cuenta coriente, hipoteca comercial  y fiansa riba termino di menos of igual na dos aña, di cual tur a nota caida. 

Inflacion

            E Indice di Prijs di Consumo (CPI), tabata 0,4 porciento mas abou na april 2021 compara cu e mesun luna di e aña anterior (Grafico 2). Esaki tabata primordialmente causa pa prijsnan mas abou den e categorianan ‘recreacion y cultura’ y ‘paña y sapato’. E promedio di inflacion di 12 luna a baha te na -2,3 porciento na april 2021. E promedio di inflacion di 12 luna, excluyendo e componentenan di energia y cuminda, tabata -1,0 porciento na april 2021 compara cu 0.1 porciento na December 2020. 

Grafico 2 - Inflacion 

Likides prudencial

            E proporcion di likides prudencial di e banconan comercial, cual ta midi e cantidad di activo likido compara cu e total activo netto di e banconan comercial, a keda na un nivel comfortabel den april 2021 (36,6 porciento), compara cu e likides minimo rekeri di 15,0 porciento.