Miss Universe a tuma parti di un encuentro na Universidad di Aruba

*Victoria Kjaer Theilvig a ricibi diferente presentacion

ORANJESTAD (AAN): Dialuna Miss Universe Victoria Kjaer Theilvig kende ta na Aruba, a bishita Universidad di Aruba.

Despues di wordo ricibi pa entre otro con rectornan Mieke de Droog y Sue-Ann Lee, Miss Universe a drenta un di e klasnan yena cu entre otro studiantenan y un cantidad di miss y ex miss, con rector Lee a expresa na Theilvig cu pa Universidad di Aruba (UA)  su bishita ta un honor.

“Nos meta aki na UA ta pa duna servicio comunitario, educacion y haci investigacion y estudio y nos por bisa cu parti di nos cuerpo di studiante a yega di forma parti di eleccionnan anterior di Miss Universe Aruba”.

Nan no ta solamente studiante of alumno, sino tambe parti di comunidad di Aruba y ta representa e obhetivo di Miss Universe.

Bo no ta solamente Miss Universe pa bo beyeza, sino bo ta representa un causa importante, segun Lee, kende a sigui bisa cu esaki ta parti di e meta di Universidad tambe, esta interactua cu comunidad y forma parti di comunidad, pa crea concientizacion y impacto.

Diego Acevedo, docente y program manager di SISSTEM cu ta e facultad mas hoben na UA tambe a hiba palabra.

Acevedo a splica cu SISSTEM ta para pa Sustainable Island Solutions through Science Technology Engineering and Mathematics.

El a duna un presentacion cortico di SISSTEM na e Miss Universe y a splica entre otro cu ta investigando maneranan con pa haci Aruba 100%  sostenible.

“E programa di SISSTEM ta enfoca riba con nos por haya desaroyonan sostenible”.

Nos tin 3 specializacion pa nos studiante, esta Tecnologia y Ingenieria, Ciencia di Medio Ambiente, Ciencia di Tecnologia di Informacion y Ciencia di Data, segun Acevedo.

El a splica tambe cu parti di e estudio ta pa e studiantenan bay den veld pa investiga mas di cerca, manera por ehempel energia di biento.