ORANJESTAD (AAN): Despues di a bishita e.o. Bonaire y Curaçao, awor e beyeza Danes,
esta señorita Victoria Kjӕr Theilvig tey desde Diabierna na Aruba. Awe Diamars e lo bandona e isla.
Manera tur ta corda, e bailarina, modelo, y empresario aki procedente di Dinamarca a ser corona na November 2024 na Mexico City, como Miss Universe 2024. Durante su bishita na Aruba, e organizacion local di My Dream Institute Foundation Aruba a ricibi’e y a prepara un programa pe durante e dianan aki cu e ta na Aruba.
Riba Dialuna, el a haci un bishita di cortesia na Parlamento di Aruba, unda a intercambia di idea cu e representantenan di pueblo.
Victoria Kjӕr Theilvig ta mucho mas cu djis un reina di beyeza. E ta defensor di derechonan di animal, profesional di comercio di diamante, y un role model pa resiliencia. Su viahe den mundo di espectaculo a cuminza cu cinco aña di edad, y atravez di añanan el a perfecciona su habilidad y su balornan, logrando etapanan remarcabel, entre otro el a sali Segundo Finalista na Miss Dinamarca 2021, y sali den Top 20 di Miss Grand International 2022.
E historia personal di Theilvig ta un testimonio di perseverancia. El a comparti hopi habri mes su experiencianan di trauma y abuso tempo e tabata mucha, usando e retonan aki como fundeshi pa su trabao di defensa. Su habilidad pa comberti dolor den un meta padilanti, a inspira hopi otro, pa mustra cu resiliencia enberdad ta e clave pa exito.
Durante su bishita na Parlamento, e tabata acompaña pa Miss Universe Aruba 2024, esta Anouk Eman.
