Meverly Romano ta duna di conoce:
ORANJESTAD (AAN)-- Tin personanan cu Departamento di Impuesto (DIMP) ta kere ta esnan cu tin debe di impuesto habri y cu nan seguro tampoco ta na ordo, cu a cuminsa falsifica e plachi blauw cu blanco. Asina Relacionista di DIMP, señora Meverly Romano a splica den entrevista cu Matutino DIARIO. Esaki ta condenabel y DIMP no ta permiti esaki bao ningun circunstancia.
“Ningun momento Departamento di Impuesto ta permiti esey. Kiermen, cada ciudadano na Aruba, si bo weita un auto cu tin un plachi di number cu no ta esun original, laga nos sa, manda nos un potret, nos departamento di inteligencia fiscal lo tuma accion riba e casonan aki”, Meverly Romano, Relacionista Publico di DIMP ta señala.
El a reitera cu e personanan cu ta core cu plachi number falso nan no mag hacie. No por core cu un plachi number cu Departamento di Impuesto no a otorga.
“Nos ta hayando reaccion di comunidad mes, nan ta manda nos e potretnan, Nos ta pidi pa manda nos potret di e auto pa nos wak ki tipo di auto e ta, pasobra nos tin un departamento di Inteligencia Fiscal, cu ta haci un onderzoek y tambe nos tin contacto cu Cuerpo di Polis, cu tambe ta controla riba caya pa e autonan aki, y pa e automobilista cu ta core rond cu plachinan falsifica. Esey ta algo cu nos ta condena y cu DIMP no ta permiti”, señora Romano a remarca.
