Miss Universe 2024 Victoria Kjær Theilvig y Prome Minister Mike Eman a planta mata nativo

Como simbolo di compromiso cu reforestacion di Aruba

ORANJESTAD (AAN): Diasabra mainta trempan, den un acto simbolico na Parke Nacional Arikok, Miss Universe 2024 Victoria Kjær Theilvig di Dinamarca, acompaña pa Prome Minister Mike Eman a planta un mata nativo di Calbas como parti di e plan nacional ambisioso pa reforestacion di Aruba. 

Natasha Silva, di Aruba Conservation Foundation (ACF), a splica cu e mata di calbas ta un di e 70 matanan nativo na Aruba. E restoracion di Aruba su vegetacion, ta rekeri cu mester planta cierto mata specifico den areanan specifico pa crea un balansa ecologico. Cada mata nativo tin su rol den mantencion di e ecosistema cu ta rondone y cada un ta sostene otro su existencia. 

Reforestacion ta crucial pa futuro ecologico di Aruba. Cu e introduccion di mata nativo, Gobierno ta busca pa restaura e paisahe natural, fortalece biodiversidad, preveni erosion, y crea un ambiente mas resistente y resiliente. Reforestacion tambe ta un paso vital den combati cambio climatico y ta yuda proteha nos recursonan natural pa futuro generacionnan. 

E presencia di Miss Universe ta trece un atencion internacional importante na e esfuerso, y ta enfatisa cu e lucha pa proteccion di nos medioambiente ta transcende frontera. E acto simbolico ta mustra con un meta comun por uni hende y forsa pa sostenibilidad y honra nos naturalesa. 

Prome Minister Eman a indica cu e plan nacional di reforestacion lo ta un plan intensivo den cual lo haci un yamada civico na comunidad, NGO's, empresanan, scolnan y turistanan, pa forma parti di e rescate di nos ecosistema. Desaroyo acelera durante ultimo decadanan a costa 70% di Aruba su vegetacion y awo ta e momento pa tuma accion y cambia e rumbo. "Naturalesa ta vincula cu otro, for di e matanan, e bestianan te cu nos lama, cada un ta conecta y ta forma un circulo ecologico." 

Tyson Lopez, director di ACF, a bay mas den detaye di con nos ecosistema ta conecta cu otro y di e trabao importante di conservacion cu Aruba Conservation Foundation ta haci na Aruba. 

E presencia di Miss Universe ta trece un atencion internacional importante na e esfuerso, y ta subraya cu e lucha pa proteccion di nos medioambiente ta transcende frontera. E acto simbolico ta mustra con un meta comun por uni hende y forsa pa sostenibilidad y honra nos naturalesa. 

Gobierno di Aruba ta gradici Miss Universe 2024 pa su apoyo simbolico y ta reafirma su compromiso firme pa un Aruba mas berde, sostenible y resiliente.