*Orario nobo di check-in cu codigo di color ta inicia diamars 17 di juni
ORANJESTAD (AAN): Aruba Airport Authority N.V. (AAA), ta anuncia introduccion di un sistema nobo di “Passenger Flow Control” pa tur pasahero cu ta sali rumbo pa Merca. E medida aki, cu ta drenta na vigor diamars 17 di juni 2025, ta diseña pa crea un experiencia di biahe mas eficiente durante e proyecto di construccion di Gateway 2030 cu ta andando.
Bao di e sistema nobo aki, e pasaheronan cu ta biaha pa Merca por drenta e terminal di check-in di Merca no mas trempan cu tres (3) ora prome cu nan ora programa di salida. Pa maneha e fluho di pasahero, lo organisa acceso pa un sistema di grupo cu codigo di color basa riba orario di salida di vuelo, manera describi den e grafico adhunto:
Lo asigna cada pasahero cu ta sali na un bentana di tempo pa drenta e terminal basa riba e ora di salida programa di nan vuelo. E medidanan aki ta destina pa mehora e fluho a traves di e proceso di check-in, reduci aglomeracion y mehora e experiencia general di aeropuerto.
Lo determina e slot di tempo pa cada pasahero cu ta bay Merca door di e informacion di buelo entrega riba e Electronic Disembarkation (ED) Card.
E residentenan cu ta sali for di Aruba pa Merca mester sigui e mesun guianan y drenta e terminal no mas trempan cu 3 ora prome cu nan buelo programa.
Den caso di un retraso di vuelo, e pasaheronan mester mantene nan mes na nan ora di salida original of consulta cu nan compania di aviacion pa mas instruccion.
Pa sostene e proceso aki, e embahadornan di Aeropuerto AUA lo ta staciona na entradanan di terminal pa monitor acceso. Lo pidi e pasaheronan cu yega prome cu nan orario asigna pa warda pafo di e terminal te ora cu yama nan grupo.
