Minister di Economia Geoffrey Wever:
ORANJESTAD (AAN) – Minister di Economia, señor Geoffrey Wever, den entrevista cu DIARIO a señala cu un di e principionan di su maneho, ta stimula, mas tanto, e comercio internacional.
Esaki ta inclui Curacao y e paisnan den e region aki, y busca cual ta e manera mas optimal pa haci esaki, kico ta e demanda di sector priva, kico gobierno mester haci pa stimula esaki.
E mandatario a trece dilanti cu el a anuncia cu na Mei proximo e “Trade Mission” pero e ta algo cu Gobierno mester determina e direccion, y mester papia cu comercio, y pesey seis siman pasa a organiza un sesion cu e comerciantenan cu e ta pensa cu ta importante, pasobra ta esnan cu ya caba ta haci negoshi cu Colombia, pues esnan cu tin un valor agrega den e tema aki.
“Nos a invita nan den mesa rondo, pa scucha di nan kico ta e preocupacionnan, deseonan, oportunidad, y unda nos como gobierno, mester enfoca. Tin biaha sector priva tin asina hopi solucion y hopi idea, cu ta nos como gobierno mester procesa esey, y nos a dicidi cu nos no ta bay hisa benta un ‘trade mission’ y bisa ‘esaki ta nos agenda y ey nos ta bay’. Nos a bay sondea prome cu nos partnernan den sector priva pa wak kico ta e caminda miho pa bay, kico ta nan preocupacion y e cosnan cu nan ta wak como dificultad. El a bay hopi bon, hopi positivo, y tin mas peticion, un demanda di mas comerciante, pasobra nos ta organizando un di dos sesion, pa asina nos por haya tur e comerciantenan cu por duna nos input, pa nos prepara e agenda, ken nos ta bay topa kico ta e proposito y con nos ta organiza e viahe pa nos por haci’e na un forma mas efectivo posible”, Minister Wever, titular di economia, a subraya.
El a menciona cu gobierno lo haci esaki hunto cu Camara di Comercio (KvK), y Departamento di Asuntonan Economico.
“E great ta cu tabata tin hopi animo, y cu nos a haya hopi informacion valido di nos comerciantenan, cu nos ta bay uza pa prepara e viahe aki”, e dignatario a conclui.
