Hopi cas na Aruba a reduci nan consumo
ORANJESTAD (AAN): E ultimo cobranza di awa a bira un sorto di orguyo pa varios habitante riba e isla. Pasobra aunke tarifa di awa ta halto, varios ciudadano a keda reduci y spaar den uso di awa... y hopi cas a haya cobranza di bao di 80 of bao di 90, of bao di 100 Florin pa luna.
Robert Croes kende ta Sector Manager di Distribucion di Awa na WEB Aruba NV a confirma esaki tambe! El a splica cu e compania ta mira esaki claramente den cifranan, y tin un cambio notable den e ‘bracket’ di hopi consumidor na Aruba.
Hopi cas a reduci nan consumo, y asina riba nan cobranza a logra di baha for di e ‘bracket’ di mas halto, a shift un poco di ariba bay abao, pues ta drentando den e bracketnan di tarifa cu ta mas abao.
Segun Croes, “Esey ta yudando!” E ta referi na diferente campaña di concientizacion di WEB Aruba NV pa sigui duna tips riba consumo responsabel, con pa spaar, y hasta con pa uza e calculator online cu nan tin riba nan website pa yuda haci calculo pa cu consumo.
E sector manager a bisa cu tin un servicio nobo computariza via telefon cu tur cliente di WEB Aruba NV por haci uso di dje, esta cu bo ta yama 280-4600, primi ‘1’ pa Papiamento, primi ‘1’ atrobe y hinca bo number di parcela (account number), y mesora e computer ta bisabo kico bo saldo ta, y e ultimo fecha di pago.
Pues bo no mester warda te ora cu e cobranza yega pa bo sa si bo ta logrando baha consumo, pasobra ta djis haci uso di e servicio di 24/7 aki via telefon computariza.
Algo interesante cu Robert Croes a splica tambe, ta e hecho cu e aparato cu e personanan cu ta tuma meter na cas ta hopi sofistica. Si acaso e yega na un cas pa check meter, y e aparato ta duna un advertencia cu e consumo di e adres ey ta hopi halto, of si acaso e mira cu e indicador di e meter ta draai pa loco siendo cu no tin hende na cas, e lo hasta cera e valve di meter, y ora di yega oficina lo informa oficina pa genera un carta pa manda mesora pa e habitantenan pa informa nan riba posible leak na nan cas.
Tur esey pa yuda consumidornan di Aruba di ta gasta awa di mas sin necesidad.
