Xiomara Hernandez, lider “Proyecto Stop violencia na Aruba”
ORANJESTAD (AAN)—E lider di e proyecto Stop Violencia pa Aruba, señora Xiomara Hernandez, a sigui splica den conferencia di prensa, cu e forza financiero di e organizacion no ta suficiente, pa motibo cu nan tin cu traha pe aworaki, pa por yega na e meta y obhetivo cu nan tin, cu ta hiba hobennan pa bay siña kico esaki ta na Hulanda.
“Nos no tin espacio aki na Aruba, pa drecha e hobennan cu ta den un mal caminda. Nos ta canando na diferente parti di Aruba, scuchando diferente testimonio, y problemanan familiar, y nos kier tey pa tur esnan cu kier haya e ayudo aki”, Xiomara a expresa.
El a reitera cu nan ta para pa stop cu violencia, y el a subraya cu nan sa cu esaki no ta nada facil, y no ta di un dia pa otro cu nan por stop cu violencia aki na Aruba, pero e ta kere cu a yega momento pa uni den e parti aki, pa mañan nos muchanan por ta feliz. “Pasobra un mucha feliz mañan ta un adulto exitoso”, Xiomara a remarca.
El a señala cu e mayor a trece nan yiu na mundo, e mucha ta bira malcria, e no ta haya suficiente educacion, pero den e caso aki e mayor ta responsable pa su yiu.
“Nos tin hendenan na scol cu ta educadornan di e muchanan: juffrouw y meneernan y nan tur seguramente mester uni, anto nos ta guia e muchanan aki. Tin hopi organizacion na Aruba cu tambe ta traha den e parti di violencia, pero nos ta un organizacion cu ta bay bira un instancia hopi grandi aki na Aruba y nos kier guia tur e muchanan aki, cu tin mas futuro, tin mas cos bon den e bida aki, cu por haci, cu no ta violencia, cana cu arma, bringa, trastorna nos hende y turista. Nos tin hopi cos cu nos kier haci cu e hobennan aki, locual no ta nada facil. Nos sa cu e trabao aki ta duro y grandi, pero NO nos tin; SI nos ta busca tur caminda”, Xiomara Hernandez a subraya.
E organizacion ta hayando ayudo di comerciantenan cu a acerca nan, unda cu nan ta duna tur di nan parti, pasobra nan ta kere den e proyecto. “Mescos cu nos ta kere den e proyecto pa diez aña rond di mundo, nos ta kere cu Aruba tambe merece di tin un miho ambiente di trankilidad y paz, den e hogar di cada un di nos”, Xiomara a indica y a bisa su slogan cu ta: “Bo por kibra mi pia, bo por kibra mi man, pero mi voz bo lo no por kibra”!
El a remarca cu e samenwerking cu tin entre e organizacion, prensa y mayornan nan por vence e violencia. El a mustra un tayo como simbolo di un hogar unda tur dia ta come di dje. Pero dia cu e tayo ey kibra e no ta sirbi mas. Por Lijm e pida, pida pero e ta keda cu cicatriznan cu hamas lo por wordo cura.
“Pesey nos ta bisa, stop violencia! Cu e accion aki, mi ta kere, nos tur por caba cu violencia na Aruba. Nos ta cuminza na cas, pasobra bo como mayor, bo yiu ta bo refleho. Locual cu bo duna, bo ta haya bek y locual e mucha aki tin na frustracion den su cas, e ta sake riba caya. Kiermen, e ta keda na ami, abo, n nos tur, pueblo di Aruba. Uno y nos ta yega unda cu nos kier yega”, Lider di e proyecto, Xionara Hernandez- Perdomo a conclui.
