Portanan di hospitalnan ta cera pa pashentnan cu no tin Covid-19 --- Cifranan di pashent na peliger ta describi abuso di democracia --- Mundo medico mester dicidi con defende bida di hende vacuna
ORANJESTAD(AAN)- Mundo medico internacional ta confronta uno di e retonan mas grandi den historia medico internacional.
Pa sostene buskeda di solucionnan husto den un situacion cu ta dicidi pa bida di hende, hospitalnan y mediconan rond mundo a cuminsa copila cifranan cu ta duna prueba con hendenan cu no kier vacuna, ta habri porta pa morto di personanan cu si a vacuna, no a haya Covid-19 pero tin chens pa muri pasobra nan no por haya Cuido Medico.
Lomba contra muraya den un situacion cu sigur no a wordo spera den e avance medico cu mundo a conoce durante ultimo siglo, mas y mas medico pero tambe instancia medico a cuminsa ta uza cifra pa busca nan razon pero tambe proteccion pa pashentnan cu ta bira victima di abuso.
DIARIO ta den contacto cu informantenan experto cu ta mustra riba un situacion sumamente serio cu ta desaroya y den cual un minoria ta abusa di democracia, pa forma un peliger pa bida di mayoria.
Si na Aruba e cifranan di e malesa a baha, na diferente pais e cifranan a bolbe subi. Hulanda ta uno di e paisnan aki mientras cu na Merca y mas pais Europeo tin temor creciente pa e peso cu Covid-19 por bira na final di 2021.
For di momento cu Covid-19 a cuminsa menasa hende, un grupo a bira victima indirecto di e malesa.
Ta trata aki di gruponan di pashentnan cu no ta sufri di Covid-19 pero si tin condicionnan medico cu ta haci cu nan mester haya atencion medico na hospital.
Intervencion medico hospitalisa a haci posibel pa e cantidad di persona cu ta muri di cancer wordo reduci manera hopi hende ta na haltura.
Pero tin tambe pashentnan di curason. Casonan di amputacion a sigui aumenta debi na falta di camanan na cantidad di pais cu no tin capacidad planea mas pa atende pashent.
Nan ta keda riba lista di espera cu ta sigui crece, pa nan haya atencion medico mientras nan salud ta empeora.
Investigacionnan cu ta wordo haci awor a base di cifranan den mundo medico, ta mustra con personanan cu no ta vacuna, ta dicidi awor riba e posibilidad pa mundo medico atende casonan di personanan cu no tin Covid-19 pero si por bira victima di otro enfermedadnan cu mester di tratamento cu nan no por ricibi.
Cifranan ta sconde e realidad di Covid-19 cu awor mundo medico mes ta uza pa describi e abuso grandi cu ta tuma lugar.
Na hopi pais caminda mayoria di e poblacion a wordo vacuna, e cantidad di caso ta bolbe subi. Esaki ta wordo uza dor di gruponan contra vacuna pa pretende cu e vacuna no ta duna resultado.
Mientrastanto e vacuna ta proteha pero cifranan oficial ta wordo manipula.
Na Hulanda por ehempel, mas cu 80 porciento di e habitantenan a ricibi vacuna. Den e cantidad aki, tin un grupo cu pa cierto motibo por wordo infecta y esaki ta haci cu a cuminsa cu e tercer vacuna pa personanan den grupo di riesgo.
Profesionalnan medico awor mas y mas ta mustra con e grupo cu no kier vacuna, ta e grupo cu ta sigui plama e malesa entre nan mes.
Mundo ta papia di porciento halto di hende vacuna pero ta lubida cuanto e total real di hende cu no a vacuna ta.
Si 20 porciento di un poblacion no ta vacuna, e grupo aki ta suficiente grandi, pa sigui plama e enfermedad entre nan mes pero asina tambe ocupa cambernan di hospital y di Cuido Intensivo, cu mester mantene nan portanan cera pa pashentnan cu otro tipo di enfermedad, cu prome cu Covid-19 a haci necesario pa habri hospital y Cuido Intensivo.
Personanan cu enfermedad manera cancer, malesanan provoca cu por cura, hasta hende cu haya accidente, awor ta wordo pone na peliger dor di e grupo cu no kier vacuna y ta sigui yena hospital.
Den mundo medico internacional ta wordo papia di un abuso di e palabra “democracia” cu e grupo cu no kier vacuna ta aplica pa asina dicidi pa otro hende cu nan mester muri!
Mundo medico ta discuti kico mester socede.
Mundialmente a keda proba cu mas cu 70 porciento cu hende hospitalisa pa Covid-19 no ta vacuna. Ochenta porciento di hende cu Covid-19 den Cuido Intensivo no ta vacuna.
Hospitalnan rond mundo mester cera porta pa hende inocente cu malesa peligroso pasobra e personanan cu ta sigui plama Covid-19 tin derecho democratico, aunke esaki ta haci cu nan ta dicidi cuanto hende lo sigui muri pa motibo di otro enfermedadnan cu no tin tempo ni lugar pa atende.
