Casonan di Covid-19 a bolbe cuminza subi na Aruba

Mas persona interna na Hospital tambe --- ORANJESTAD (AAN): Diamars atardi algun hende a bisa: “Here we go again”. 

Kizas e flexibilizacion a pone tur hende lubida cu Coronavirus tey ainda?   Dialuna solamente 8 caso positivo di Covid-19 a wordo registra, y Diamars e golpi duro a bin cu tin 33 caso nobo registra.  Y esey ta preocupante.

 Segun resumen di diamars, 9 persona a recupera y un total di 33 caso nobo di COVID-19 a keda registra di cual 1 ta no-residente. E cifranan aki ta representa un 'Positivity rate' bou di residentenan di 16%.

E cantidad di casonan activo di COVID-19 ta 164 y cantidad di fayecidonan relaciona cu COVID-19 ta 171.

Datonan ta ilustra casonan nobo di COVID cu un average semanal di 15 caso pa dia y un averahe di 'positivity rate' semanal di 11% pa dia.

Actualmente na Aruba tin 13 persona interna debi na COVID di cual den ICU tin 4 persona, riba piso general tin 9 persona y na Colombia tin actualmente 16 persona den Cuido Intensivo.

Suavisacion di medidanan a bin ta resultado den aumento di casonan si ta constata cu den fin di siman tabata tin basta actividad cui aglomeracion unda masha tiki hende tabata tin tapaboca bisti.

Tambe ta mira hende aglomera riba caminda publico ta bebe y fiesta tur caminda. Esaki sigur ta trece hopi preocupacion den comunidad.