Ministronan Gerlien y Wendrick a ricibi prome ‘finisher’ medaya di KLM Aruba Marathon 2026

ORANJESTAD (AAN): Minister Gerlien Croes (Deporte) y Minister Wendrick Cicilia (Turismo), a wordo entrega cu e prome “finisher” medaya di e KLM Aruba Marathon 2026.

   E medaya a wordo entrega pa sr. Kees van Muiswinkel, Presidente di Foundation Run in the Sun Aruba, como un gesto di gradicimento na e pais Aruba. Esaki a tuma lugar durante un reunion oficial na e oficinanan di gobierno diabierna atardi.

   E Foundation Run in the Sun Aruba, funda na 2018 pa promove turismo, coremento y un estilo di bida saludabel riba e isla, ta organiza e Marathon anual di KLM Aruba. E marathon, awor den su di 8 aña, lo tuma lugar diasabra 6 juni y diadomingo 7 juni, y ta casi sold-out.

   Sr. Kees van Muiswinkel a informa: “Pa e di 8 edition aki, nos ta entusiasma di por yama bon bini na 3.000 participantenan, cu 850 coredor internacional, hunto cu nan amigonan y famianan, treciendo un total di 1.950 ‘runcation’ turistanan na nos One Happy Island. Nos marathon y e otro distancianan ta cumpli cu e normanan internacional di mas halto, pasobra e ta certifica pa AIMS/World Athletics, y ta  accesibel pa tur hende cu varios opcion di distancia. Nos meta ta pa brinda un experencia inolvidabel pa tur participantenan.”

    Puntonan importante di e KLM Aruba Marathon 2026:  Lo tin participacion: 3.000 coredor di 42 pais.  Pa distancianan tin 4 opcion: Marathon, Half Marathon, 10KM, y 5KM.

   Premionan: Ganadornan overall: e #1, #2 y #3 homber y muhe di tur distancia lo wordo honra riba e podium cu un copa special.  (*) Kibramento di record: cada coredor (homber of muhe) cu lo kibra e record di Aruba Marathon di 02:37:13 y lo gana e titulo general na 2026 ta ricibi un premio cash di USD 2.500.

   (*) Ganador Arubiano: e homber y muhe di Aruba mas liher den e distancia di marathon lo gana cada uno un pasashi ida y buelta cu KLM pa Amsterdam y participacion garantisa den e Marathon di Amsterdam cu ta sold-out caba.

   (*) Premionan di grupo di edad: medaya lo wordo entrega na e tres miho finalistanan den cada categoria di edat pa tanto hende homber como hende muhe.

   (*) Evento inclusivo: bon bini na tanto participantenan internacional como local, homber y muhe. Extras di careda: numbernan di careda personalisa, registracion di tempo online, camisa Dri-Fit di evento, medayanan luhoso, hopi stationnan di awa, bebida deportivo y fruta.  E ruta di coremento lo ta un paisahe espectacular di Aruba.

   Den tecnologia lo tin un App gratis cu ‘Live Track & Trace’ pa tracking di e participantenan den tempo beradero.  Lo tin beneficionan adicional: certificado di participante gratis, camisa Finisher DRI-Fit opcional, Finisher singlet, Pasta Party, y potretnan personal.  Riba tereno di siguridad: un ambiente festivo garantisa mientras cu e siguridad di tur participantenan y publico ta priorisa.

   Por inscribi ainda online na klmarubamarathon.com y cu opcion di pago disponibel online, via transfer bancario na Florin.

    E KLM Aruba Marathon ta un careda oficialmente certifica pa e Association of International Marathons and Distance Races (AIMS) y the World Athletic Federation, sigurando su status como un careda di caminda internacional di primera categoria.

    E organizacion ta desea un y tur un bon preparacion pa nan participacion den e di 8 edicion di KLM Aruba Marathon y ta premira di por traha hunto cu tur e partnernan y voluntarionan pa haci un evento hopi exitoso.