Ministronan a acorda pa instala camera na cuatro scol secundario

ORANJESTAD (AAN): E proyecto di camera pa yuda garantiza seguridad na Aruba, a drenta awor pa Fase #3.

   Minister Endy Croes di Enseñansa a reuni cu Minister di Husticia Rocco Tjon y su team pa trata cierto problema di seguridad na e scolnan E.P.B. Oranjestad, E.P.B. San Nicolas, SPO Santa Cruz y SPO Brazil.

   Durante e reunion a evalua con por tin un miho maneho riba e hobennan su ta causa hopi problema na scol. Banda cu tin un plataforma mas grandi cu ta trahando caba via Veiligheidshuis pa tin un solucion structural pa e alumnonan aki, Minister Endy Croes hunto cu Minister Rocco Tjon a traha un plan integral.

   Minister di Enseñansa Endy Croes a indica cu mester pone atencion di inmediato riba e asunto aki y esaki a desemboca cu e siman aki, un team cu ta atende cu e camaranan di siguridad lo haci un evaluacion na E.P.B. Oranjestad, E.P.B. San Nicolas, SPO Santa Cruz y SPO Brazil, unda e 4 scolnan aki lo keda conecta riba un sistema di camara cu polis tin control 24/7.

   Pues, ta bay tin control severo door di pone camara rond di ful e scolnan aki y di e forma aki minimalisa e tendencia di bringamento na scol. Ademas di esaki, Departamento di Asunto Social lo atende cu famia di e alumnonan cu ta causa problema pa trece trankilidad y mitiga problema na scol. Minister di Enseñansa a indica cu e proyecto ta den proceso y ta trahando den colaboracion cu Minister di Husticia pa dentro di 2 luna por instala camara rond di e scolnan aki