Ministro Xiomara Maduro a reuni den e 'Vierlandenoverleg' riba Enseñansa y Cultura

ORANJESTAD (AAN): Na Den Haag, Hulanda Minister di Cultura Maduro a reuni cu e mandatarionan encarga cu Enseñansa y Cultura den Reino Hulandes den cuadro di e 'Vierlandenoverleg'.

Hulanda a worde representa pa Secretario di Estado Señora Uslu, Pais Curaçao a worde representa pa Minister sr. Heydoorn y Pais St. Maarten a worde representa pa Minister Plenipotenciario Sr. Panneflek.

   Topiconan cu a worde trata riba e parti cultural ta, educacion cultural, conservacion di nos herencia cultural sub aquatico y herencia cultural inmateriaal. A elabora tambe riba e trabaonan cu ta worde haci pa yega na un fondo special pa e paisnan den Caribe Hulandes por haci investigacion y documenta nos herencia cultural. Na final di e reunion e mandatarionan a firma un ‘Slotconclusie’ den cual riba cada tereno a acorda e trabaonan cu ta necesario e tempo nos dilanti.

   Educacion cultural: A keda acorda cu trabaonan lo sigui den cada Pais pa institui un Comision Nacional cu lo ta encarga pa lidera e trabaonan necesario pa na scol y den comunidad por tin programa di educacion cu ta dirigi pa educa riba e cultura di cada Pais. A encarga e grupo di trabao pa fiha e puntonan di salida comun pa arte y cultura teniendo cuenta cu e contexto local den cada Pais.

   Tambe a pidi e grupo di trabao pa haci un inventarisacion di tur locual ta e actividadnan cu tin riba e tereno di arte y cultura den Reino Hulandes y pa esaki ta disponibel pa e proximo ‘Vierlandenoverleg.’ A pidi e grupo tambe pa traha un presupuesto pa e plan di accion cu ta necesario pa por haci educacion cultural posibel den e Paisnan den Reino Hulandes.

   Herencia Cultural Sub-aquatico: Trabaonan a worde haci pa asina prepara e cambionan den ley cu ta necesario pa asina por ratifica e proteccion necesario pa e herencia cultural cu ta bou awa na e Paisnan den Reino Hulandes. E grupo di trabao a worde pidi pa raporta na momento cu e leynan necesario a worde cambia.

   A bay di acuerdo cu a procedura pa haci nominacion pa e ‘UNESCO register of good safeguarding practices,’ y a bay de acuerdo cu e nominacion di ‘Tambu” como herencia cultural cu ta worde conserva pa asina por worde transmiti pa e generacion cu ta sigui.

   A tuma nota di e trabaonan cu a worde haci pa e grupo di trabao pa por duna e fondo cultural contenido, y awo lo haci esfuerso pa asina por aloca e fondonan necesario den e presupuestonan di cada Pais den Reino Hulandes.

   Herdenking slavernijverleden: Na final di e reunion prome cu a pasa pa firma e ‘Slotconlcusies,’ a trata e topico di ‘Herdenking van het Slavernijverleden’ como un tema cu a bin riba mesa. Aki ta unda cu e Paisnan Curaçao, Aruba y Sint Maarten a vocifera nan descontento y nan desaprobacion pa e manera con e Paisnan aki ta worde trata den e negosacionnan pa refinancia e debe crea cu Hulanda pa sobrepasa e pandemia di Covid-19.

   E mensahe principal tabata cu Hulanda por a haci miho door di a yuda e Paisnan den Caribe Hulandes y no djies impone un ‘strafrente’ cu ta bolbe trece un forma nobo di sclavitud den Reino Hulandes cu ta haci e despensa ofreci di 19 di december 2022 perde su balor y significacion. Aruba, Curaçao y Sint Maarten a pidi Secretario di Estado Uslu pa trece e mensahe aki na atencion di su coleganan di e Conseho di Ministronan di Reino Hulandes.