Minister di Energia a expone Aruba su compromiso pa cu transicion energetico

Ministro Glenbert Croes: 

• Den cuadro di e di 5 edicion di e "German Caribbean Energy Conference" 

ORANJESTAD (AAN): E siman aki, Minister di Energia Glenbert Croes acompaña pa Prome Minister Evelyn Wever-Croes tabata presente na e di 5 edicion di e German Caribbean Energy Conference.

   E conferencia aki ta organiza pa e "Dutch-German Chamber of Commerce", na unda delegacionnan di Alemania, Hulanda y otro paisnan a participa. Durante e conferencia aki, participantenan por a sera conoci cu experto y inversionistanan Aleman, interesa den acelera e transicion energetico den Caribe. Tambe tabata presente un delegacion di Curaçao pa comparti nan vision pa cu un "hydrogen valley".

   Durante e conferencia aki, Minister Croes, tabata tin e oportunidad di duna un discurso, na unda el a gradici e Ministerio Federal di Alemania pa Clima y Energia pa apoya e iniciativa aki. Pa cu e conferencia aki, companianan Aleman, Hulandes y di otro paisnan ta bin Aruba pa combersa cu companianan local, priva y gubernamental, pa mira ki iniciativanan, nan lo por haci hunto cu e profesionalnan local. Esaki sigur ta crea oportunidadnan grandi pa pais Aruba. E mandatario a recomenda e companianan Aleman pa traha cu companianan local den proyectonan energetico pasobra cu Aruba ta conta cu gran profesionalnan riba e tereno aki.

   Minister Croes a splica cu Aruba a implementa su "Energy Policy" pa cumpli cu e obhetivonan di 2030, y cu e acuerdo di Paris pa 2050. Aruba ta comprometi pa reduci emision y mitiga calentamento global, evitando asina e consecuencianan cu esakinan lo por trece cu nan. E mandatario a expone e compromiso di pais Aruba pa cu e transicion energetico, indicando cu Aruba ta den proceso pa expande e parke solar y e parke di molina di biento, tambe lo transforma zona di refineria. E mandatario a trece dilanti cu a firma un acuerdo cu e compania Europeo Acciona Energia pa traha e "green hydrogen valley" cu e meta pa aki dos aña, Aruba ta completamente independiente di "heavy fuel oil" mas.

   "Como Gobierno di Aruba, nos ta comprometi pa sostene tur compania cu kier uni nan mes na e vision aki. E prosperidad di Aruba, ta conta riba compromiso di nos tur, pero tambe di un compromiso pa bin cu sectornan nobo cu lo aporta na progreso di nos turismo. Pandemia a siña nos, cu nos no por keda depende di un pilar so. E zona di refineria, e zona energetico, e sector di refineria y di energia y su transformacion, ta e gran oportunidad pa nos por aporta na un prosperidad nobo y continuo. Mi ta gradici e companianan Aleman y Hulandes pa nan confianza y pa haci Aruba e cede anual pa discuti y analisa hunto riba e futuro cu nos yiunan tin derecho riba dje", Minister Croes a expresa.