Ministro Xiomara Maduro a bishita Archivo Nacional Aruba

ORANJESTAD (AAN): Recientemente, pa cera conoci cu e departamentonan cu ta resorta bao di Ministerio di Finansa y Cultura,

Minister Xiomara Maduro a bishita Archivo Nacional Aruba (ANA) pa cera conoci cu e personal y e trabaonan cu ta worde haci pa e departamento.

   E bishita a cuminsa cu un reunion cu e staff di ANA, encabesa pa e director Sr. Raymond Hernandez. Durante e reunion aki, Minister Maduro a haya un bista di tur locual ta trata e trabaonan cu ANA ta haci, e importancia di e trabao aki pa Pais Aruba, e retonan cu tin awor y esnan cu futuro lo trece cun'e mirando e desaroyonan mundial cu tin riba e tereno di archivo y su conservacion como patrimonio nacional.

   Despues di e reunion, Minister Maduro a cera conoci cu e personal di ANA y nan trabao. Durante e recorido, Minister Maduro a haya un bista di e proceso di archivo di documentonan y a worde sorpresa cu e file di su defunto Tata, kende como director suplente di Bureau Interne Diensten, a percura pa traha riba e arhivo historico nacional pa nos Pais. Minister Maduro a haya e oportunidad tambe pa por admira e buki di mas bieu den e coleccion di ANA, cual ta e buki titula 'Rekwesten 1816 -1839.'

   E mandatario a presencia e proceso di restauracion di un di e bukinan di mas bieu cu ANA tin den su coleccion. E buki ta data di aña 1867. Minister Maduro a tuma parti tambe na e proceso di conservacion, aplicando un lijm special na un di e documentonan y cu esaki a yuda conserva e documento aki pa e proximo 100 aña. Na final di e recorido Minister Maduro a ricibi e 'stamboom' di su famia como un bunita recuerdo di su bishita na ANA.

   Minister Maduro ta gradici e director y henter e personal di ANA pa un mainta informativo pa por a haya un bon bista di e importancia di ANA su trabao pa warda, cuida y proteha e archivo cu tin balor historico pa nos Pais.