Awe ta Dia Internacional di Lenga Materno  

ORANJESTAD (AAN): Dia Internacional di Lenga Materno ta riba 21 di februari di tur aña, esaki segun proclamacion di UNESCO.

Departamento di Cultura Aruba (DCA) tin e proyecto di ‘Arte di Palabra’ (AdP) cu ta un competencia di conta cuenta y di storia cortico, y skirbi y declama poesia pa e hoben escolar.

   Inscripcion a habri y por inscribi pa e competencia di e aña aki. Tur alumno di scol secundario por participa y por inscribi cerca nan docente di Papiamento te cu dia 14 di maart 2022.

   AdP Interinsular ta un competencia entre Curaçao, Bonaire y Aruba. Esaki ta un competencia pa alumnonan di scolnan avansa cu DCA ta organiza for di 2009 y cu aña pa aña e interes bou di nos hobennan ta creciendo pa participa. E aña aki lo ta bay ta e di 14 edicion di AdP cu lo tuma luga riba dia 2 di april 2022 na Cas di Cultura.

   Meta di e proyecto aki ta pa duna hobennan e oportunidad pa demostra nan creatividad literario; pa promove lesamento y skirbimento den nos idioma Papiamento; pa stimula publicacion di arte literario den Papiamento, y tambe pa e hobennan di A.B.C. tin un intercambio den nan cultura.

   Cu e proyecto aki DCA ta traha hunto cu Fundacion Corectornan Papiamento Aruba. Pa medio di e competencia aki di Arte di Palabra ta stimula e hobennan pa medio di nan poesia of cuenta cortico haci bon uzo di nos idioma Papiamento y enrikece nan conocemento di nos idioma.

   Ora di saca informacionnan cultural di tur loke ta publicacion. DCA ta haci su esfuerso pa percura pa tur ta den bon idioma Papiamento. Na momento di duna relato den forma oficial nos di DCA ta aplica e Vocabulario Ortografico di Papiamento di 2009.

   Den sentido general ta considera idioma, como e medio unificado di mas importante di un cultura. Idioma ta carga tur pensamento y experiencia humano, cultura y identidad. Idioma ta transferi cultura.

   Mirando esaki DCA tin idioma Papiamento como un punto importante den su educacion cultural. Ortografia, idioma, literatura den lenga materno, nan tur ta un simbolo sumamente importante, como muestra di un propio identidad. Mester mustra cu e oficialisacion por crea aprecio y stimula nos pa, cu orguyo y amor, siña nos hendenan conoce e historia di nos idioma materno bon y promove e uzo corecto di papi’e y skirbie (papia- y skirbimento).

   Durante e desaroyo di nos idioma materno Papiamento y como Departamento di Cultura Aruba bou auspicio di Ministerio di Cultura ta keda enfoca pa su retonan pa educa, promove, cuida y hacie mas conoci e bon uzo di nos Papiamento pa generacionnan cu ta bini.

   Pabien Arubianonan riba Dia Internacional di Lenga Materno riba 21 di februari 2022.