Ministro Wever apreciando e chens nobo pa educacion continuo y profesionalisa sector financiero

ORANJESTAD (AAN): Den fin di siman, Ministro Geoffrey Wever tabatin e placer di ta presente na e iniciativa di Doc Opleidingen y Lindenhaeghe,

cu ta trece un oportunidad nobo pa educacion continuo y profesionalisacion di Aruba su sector financiero.

   Lindenhaeghe tin amplio experiencia den formacion financiero na Hulanda y, hunto cu Doc Opleidingen, tin e intencion pa desaroya trayectonan adapta na realidad y necesidad di e mercado di Aruba. E ambicion ta pa atende diferente parti di nos sector financiero, entre otro seguro, banco, fondo di pension y tambe real estate.

   E prome paso a wordo tuma cu un programa piloto pa Assurantien-Schade, y awe nos por celebra e participantenan cu a completa e trayecto.

   Un sector financiero fuerte no ta depende solamente di bon regulacion y institucionnan solido. E ta depende tambe di profesionalnan cu ta sigui desaroya nan conocemento y cu ta mantene nan mes na altura di cambionan den e industria, maneho y legislacion.

   Ministro Wever a splica cu e ta aprecia cu e iniciativa aki ta wordo desaroya cu input local. Esaki ta e manera pa construi capacidad local y eleva e nivel profesional di un sector cu tin un funcion importante den nos economia.

   Felicitacion na tur participante y na Doc Opleidingen y Lindenhaeghe pa e iniciativa. E ta spera cu esaki ta solamente e cuminsamento di mas oportunidad pa desaroyo profesional na Aruba.