Ministro Ursell Arends lo sigui sostene Telefon pa Adulto Mayor

Via di Directie Ouderenzaken

• Un herment cardinal pa yuda esnan di edad grandi 

ORANJESTAD (AAN): Diamars atardi a tuma lugar na Centro Kibrahacha na Piedra Plat un ceremonia special pa conmemora algo special.

   Ministro Ursell Arends, kende ta atende asunto di nos grandinan, tabata presente tambe na Centro Kibrahacha pa cu e celebracion ta den cuadro di e prome aniversario di Proyecto 125, cu ta encera e liña di telefon 125 cu ta specialmente dirigi pa yuda Adultonan Mayor.

   Proyecto 125 a bira realidad bek atrobe danki na colaboracion intenso entre Gobierno, Setar NV, y mas stakeholder cu a yuda pa pone un biaha mas riba pia.

   Ministro Arends ta corda ainda e conferencia di prensa cu el a duna un poco mas cu 1 aña pasa pa anuncia e comienso di e Telefon pa Adultonan Mayor hunto cu Centro Kibrahacha.

   Ministro tabata contento di tey bek na e curazon di e iniciativa, cu ta Club Kibrahacha.  Telefon pa Adulto Mayor, cu su liña 125, a bira un punto di sosten pa adultonan di edad grandi cu tabata sinti nan mes den soledad.  Despues di un aña cu nan a traha hunto cu Directie Ouderenzaken, Centro Kibrahacha, y e boluntarionan, a crea un “orea” pa yuda e adultonan mayor combati soledad.

   “E ta un tremendo proyecto, y ta dunando su resultadonan,” Ministro Ursell Arends a indica.  El a gradici e boluntarionan, como tambe Centro Kibrahacha, cu a gara e proyecto aki cu dos man y a haci’e bira realidad y awor por mira cu e resultadonan ta positivo.  E proyecto aki awor a bira uno di termino largo, y e nocion di Ministro Arends ta cu e adultonan mayor ta contento, y cu e proyecto aki ta trece felicidad tambe cerca adultonan mayor.

   Ministro a admira con Club Kibrahacha a traha duro pa a haya boluntario pa yuda e proyecto, y awor ta ocupa cu un campaña pa busca mas boluntario, como cu den futuro lo no djis bay ofrece Liña 125 den siman so di 8:00 am te cu 4:00 pm, pero trata di introduci e servicio den fin di siman tambe.

   Segun Ministro, Directie Ouderenzaken tin contacto estrecho cu Centro Kibrahacha, pa asina di parti di Gobierno keda duna sosten pa asina sigui yuda nan, no djis cu e parti financiero, sino tambe cu otro hermentnan pa por sigui engrandece e Telefon pa Adulto Mayor.

  Ministro Ursell Arends a subraya cu e mes lo sigui sostene e proyecto aki, debi cu el a bira un herment cardinal pa yuda nos hendenan di edad riba e isla, kendenan ta bibando solitario.  Tambe lo sigui pusha pa e boluntarionan haya training, pa ricibi educacion riba e servicio y alternativanan pa atende nan den comunidad.  Via di Telefon 125 ta yuda guia nan pa yega den esaki.