Ministro Ursell Arends a bishita Stichting Ambiente Nobo

Admiracion pa personal cu ta yuda comunidad

ORANJESTAD (AAN): Minister Arends hunto cu su ekipo a bishita recientemente Stichting Ambiente Nobo, un pasadia cu ta ofrece servicio na adultonan cu limitacion mental. E bishita aki a lanta consientisacion tocante e rol importante cu e fundacion ta hunga pa enrikece bida y fortalece un sentido di comunidad pa su clientenan.

   Pa casi dos decada, Stichting Ambiente Nobo ta mas cu simplemente un luga pa pasa dia, den un ambiente vibrante unda tanto adulto mayor como adulto menor por entretene nan mes, haya compania, y un oportunidad pa keda mentalmente y fisicamente activo. E clientenan ta motiva pa tuma parti den actividadnan cu ta mantene nan alegre y conecta, haciendo asina cada dia significativo.

   Durante e bishita, e fundacion a comparti algun di nan preocupacionnan, particularmente e necesidad urgente pa mas personal. Cu 36 cliente actualmente bao di nan cuido y un lista di espera cu ta creciendo, ta claro cu tin mester di mas man y curason pa duna e atencion necesario.

   Gobierno di Aruba ta reconoce e pasonan crucial cu mester tuma pa atende cu esaki, asegurando cu e miembronan mas vulnerabel di nos comunidad ta haya e atencion y cuido cu nan merece.

   Stichting Ambiente Nobo ta dedica pa atende e necesidadnan diverso di nan clientenan, ofreciendo un enfoke holistico pa nan bienestar. Di 8’or di mainta te cu 4:30’or di atardi, e fundacion ta brinda un ambiente di cuido, preveniendo cu e cliente keda na cas sin net nada pa haci. Sin e opcion di pasadia aki, hopi lo ta enfrenta mas limitacion y isolacion.

   Ministro a splica cu el a keda profundamente movi pa e gran colaboracion di e fundacion cu varios partnernan, incluyendo Trampolin pa Trabao, Sonrisa Aruba, y otro organizacionnan cu ta duna sosten. Nan esfuersonan combina ta crea cadena di sosten cu ta trece alegria y proposito na bida di cada cliente.

   Palabra di gradicimento ta bay na ful e bestuur, lidernan, y stagairenan di E.P.I. y EPB pa nan trabao extraordinario pa sirbi nos comunidad. Minister Arends a expresa su aprecio pa e bon trato y experiencia positivo cu e clientenan ta ricibi. Un dia yena cu sonrisa, speranza den nos comunidad y un compromiso firme pa haci un diferencia.