Ministro Plenipotenciario na recepcion di despedida pa Comandante Koninklijke Marechaussee

ORANJESTAD (AAN); Informacion for di Den Haag ta indica cu Minister Plenipotenciario mr. Ady Thijsen riba invitacion di secretario general di Ministerio di Defensa Gea van Craaikamp tabata presente

na un recepcion special na Sociëteit de Witte pa tuma despedida di Commandante di Koninklijke Marechaussee luitenant-generaal Hans Leijtens.

   Den su discurso señora Van Craaikamp a gradici luitenant-generaal Leijtens pa su bon trabao cu el a bin ta haci pa Koninklijke Marechaussee. Tambe pa e hecho cu despues di a bandona servicio di Koninklijke Marechaussee a regresa back na momento cu a haci un apelacion riba su personan. Esaki segun señora van Craaikamp ta demostra e loyalidad di luitenant-generaal Leijtens pa Defensa y particularmente e division di Koninklijke Marechaussee.

  Despues di e parti formal, Minister Thijsen a haci uso di e oportunidad pa desea luitenant-generaal Hans Leijtens tur clase di exito den su funcion nobo como director ehecutivo di Frontex. Esaki ta un agencia special di Union Europeo pa brinda cooperacion entre e paisnan miembro di Union Europeo pa loke ta trata e frontera entre Europa y e paisnan no Europeo.

  E mandatario a saluda y gradici señora Van Craaikamp pa e invitacion. Van Craaikamp a yega di ocupa e posicion di director Koninkrijksrelaties na e ministerio di BZK.

   E potretnan ta cortesia di Arubahuis.