Ministro Maduro ta felicita e grupo di Aduanero cu a cumpli 40 aniversario

ORANJESTAD (AAN): Recientemente un grupo di Aduanero a cumpli 40 aña trahando como empleado publico na bienestar di Pais Aruba.

Pa e ocasion special aki Minister Maduro a ricibi e grupo na Bestuurskantoor pa asina por felicita y entrega nan decreto gubernamental corespondiente y tambe un regalo pa recorda e aniversario importante aki di trabao.

   Minister Maduro ta felicita y gradici señora Patricia M. Illis, sr. Roald J.A. Web, sr. Simon L. Backer, sr. Ernestor I. Marin y sr. Constantino J.R. Wernet cu e aniversario importante di trabao. ‘Ta un grupo cu a yuda crea un bon fundeshi pa e Cuerpo di Aduana cu nan trabao y nan experiencia acumula durante 40 aña, algo cu nos mester aprecia como comunidad,’ tabata Minister Maduro su palabranan pa expresa su gratitud na e Aduaneronan presente.

   Tambe a duna pabien na señora Magda J. Cardoze y señora Catharina M. Fingal cu tambe a cumpli 40 aniversario, pero no por tabata presente pa ricibi nan felicitacion den persona. Masha danki na cada un di boso pa boso aporte na bienestar di Pais Aruba.