ORANJESTAD (AAN): Minister di Energia Glenbert Croes hunto cu representantenan di WEB Aruba NV, NV Elmar, Utilities Aruba NV, y RdA a biaha pa Spaña pa asina concretisa e plannan pa cu e Aruba Hydrogen Valley.
Minister Croes a indica, basa riba e reunionnan cu lo bay tin, pronto su persona lo duna pueblo e bon noticia, cu e proyectonan pa cu esaki lo cuminsa worde ehecuta. Esaki sigur ta di gran beneficio pa pais Aruba, mirando cu e plannan aki lo crea oportunidadnan grandi pa e mercado laboral.
Minister Croes a expresa cu unabes e plannan aki worde concretisa, pueblo lo bay sinti e impacto positivo pa loke ta e desaroyo energetico, riba e economia di pais Aruba. San Nicolas lo para back riba su pianan, trabaonan ta worde crea y contratistanan lo cuminsa labora.
Esaki ta e motibo pa cu Minister Croes y su delegacion a biaha pa Spaña, pa tuma e decisionnan cu mester worde tuma y pa cera acuerdonan cu e gruponan di renombre cu lo ta encarga pa impulsa e proyectonan aki pa Aruba.
