Ministro Geoffrey Wever a nota cu Agri Business Academy a resulta un exito

ORANJESTAD (AAN): “Mi ta hopi contento y orguyoso pa wak cu e Agri Business Academy a culmina cu 17 persona cu a ricibi nan certificado,” ta loke Ministro Geoffrey Wever a indica.

   El a sigui bisa: “Ora mi a bira Minister mi a worde acerca door di Qredits pa Gobierno sera un parnership cu Qredits pa nos boost e sector di agricultura for di perspectiva empresarial y hunto cu Minster Arends nos a cerca un Memorandum of Understanding pa organiza e Agri Business Academy y ofrece esaki na total 60 persona.”

   E ta un curso di 12 siman di educacion di agricultura pero di perspectiva di un negoshi. Ministro ta sumamente contento cu e idea aki a bira un realidad, asina a demonstra di traha hunto como minister y sector priva na beneficio di ciudadanonan. Esaki ta un inversion cu gobierno ta haci den ciudadanonan. Cu e poco fondo nan cu tin nos ta purba trece cambio importante.

   Despues di a pasa den e trayecto di Agri Business Academy, un prome grupo di (futuro) empresarionan a ricibi nan certificado den presencia di Minister Geoffrey Wever y Minister Ursell Arends.

   Meta di e Agri Business Academy ta pa na un manera personal y profesional , yuda cada uno cu tin e deseo di habri su mesun negoshi den agricultura of yuda esun cu kier pa su negoshi crece den e sector di Agricultura. 

  Negoshinan y talento empresarial ta esencial pa nos economia crece y desaroya, y den e proceso aki, Gobierno di Aruba tin e rol di facilita pa cada ciudadano por haya e conocemento y habilidad pa maneha un negoshi. Den e caso aki, maneha un negoshi den e sector di agricultura, un sector cu un potencial grandi pa crece. Como parti di e maneho pa stimula comercio, e Agri Business Academy ta un instrumento pa yuda e (futuro) comerciante crece y bira exitoso. Di e forma aki gobierno ta traha activamente cu sector priva pa diversifica nos economia, creando asina cuponan di trabao nobo, entrada pa gobierno y haci Aruba menos dependiente di influencia internacional segun Minister Wever.

  Minister Geoffrey Wever ta desea cada participante exito cu nan ambicion pa habri y maneha nan negoshi den e sector di agricultura y ta gradici Qredits Aruba pa e bon cooperacion di semper pa hunto facilita cu nos ciudadanonan tin acceso na un programa, e Agri Business Academy. Un programa cu lo contribui grandemente na stimula comercio y talento empresarial di Aruba. Pronto lo duna e oportunidad na un grupo nobo pa participa na e Agri business Academy.