Ministro Geoffrey Wever a felicita SNBA cu nan exitoso cumbre na San Nicolas

ORANJESTAD (AAN): E siman aki, Ministro Geoffrey Wever hunto cu Premier Eman y tambe Ministro Rene Herdé tabata presente na e apertura di e tercer San Nicolas Business Summit,

organisa pa San Nicolas Business Association (SNBA). Ministro Wever a felicita SNBA pa e iniciativa importante aki, cu ta reuni sector empresarial, inversionistanan y Gobierno pa dialoga tocante e futuro economico di San Nicolas.

   San Nicolas tin un potencial economico enorme. Pa logra desaroyo duradero, nos mester stimula inversion, fortalece comercio local, crea oportunidad pa comerciantenan y atrae mas actividad economico den e districto.

Esaki ta precisamente e direccion cu Gobierno AVP-Futuro a establece den su Programa di Gobernacion 2025-2028, caminda revitalisacion di San Nicolas, diversificacion economico y stimulacion di comercio ta ocupa un luga importante.

   Como Minister di Asunto Economico, mi ta comprometido pa traduci e vision aki den accion concreto. Cu iniciativanan manera San Nicolas Pop-Up Market, nos ta crea un plataforma pa comerciantenan local, mientras cu nos ta atrae mas bishitante y actividad economico pa centro di San Nicolas.

   Alabes, Gobierno a introduci incentivanan fiscal pa stimula inversion den renobacion y desaroyo di edificionan den centro di San Nicolas. Cu esaki nos ta crea condicionnan mas atractivo pa inversionistanan, stimula actividad comercial y habri caminda pa oportunidadnan nobo.

   Pero desaroyo economico ta un responsabilidad comparti. Gobierno ta crea e condicionnan y facilita oportunidadnan, mientras cu sector priva ta hunga un rol esencial den inversion, innovacion y creacion di empleo.

San Nicolas su futuro no ta solamente den su historia y su potencial, sino den e inversionnan, iniciativanan y oportunidadnan cu nos ta crea awe.

   Hunto cu sector empresarial y comunidad, nos ta sigui traha pa un San Nicolas cu mas comercio, mas inversion, mas oportunidad y un futuro economico mas fuerte.