Ministro Endy Croes ta orguyoso cu Cruyff Courts a duna ok pa pone nomber di Denzel Dumfries riba esaki

ORANJESTAD (AAN): Diaranson atardi na Parke Curazon na Jaburibari, a tuma lugar e re-apertura di e cancha chikito di futbol cu antes tabata yama ‘Johan Cruyff Court’. 

Pero awor el a bira conoci como “Cruyff Court Denzel Washington”.

    Un ceremonia special cu hopi dignatario, futbolista hoben, y invitadonan special di e.o. IBiSA, FCCA, AVB, y Simon van Rooijen di Cruyff Foundation, Nicole Hoevertsz di COA, ASU, a ser teni pa asina e cancha completamente remodela por a habri bek.

   Johan Cruyff Foundation a wordo lanta na 1997 door di e futbolista Johan Cruyff mes, cu e meta pa ofrece proyectonan na comunidad, y Aruba a ricibi uno di nan.

   Ministro di Deporte Endy Croes tambe a hiba palabra, y el a bisa cu pe ta un honor pa ta eynan, y a expresa den direccion di Simon van Rooijen di Johan Cruyff Foundation, bisando cu na nomber di Gobierno di Aruba y tur stakeholders, el a gradici e fundacion pa e inversionnan haci pa a trece, y awor renoba e cancha aki na Parke Curazon na Jaburibari.

   Tabata 6 November 2006 cu e cancha di Cruyff Court aki a wordo inaugura, unda e futbolista Johan Cruyff mes a saca e prome bala, den presencia di Su Mahestad Reina Beatrix.  Ministro Endy Croes a indica cu e tambe tabata presente e dia di inauguracion ey.

   E titular di Deporte a indica cu danki na e cooperacion y aprobacion di Johan Cruyff Foundation, e cancha aki lo haya e nomber di e estreya internacional di futbol local, esta Denzel Dumfries.  E ta bira conoci awor como Cruyff Court Denzel Dumfries.

   Dumfries ta hungando awor pa e team di Inter Milan cu a caba di bira campeon na Italia, y semper ta forma parti di e oncena di team Hulanda.

   Ministro Croes ta convenci cu esaki lo yuda stimula hobennan di Aruba, y pesey nan ta felicita Denzel y tambe henter famia Dumfries cu e honor aki.  El a menciona tambe presencia di familiar Dirk Dumfries na e ceremonia, y a bisa cu e conoce e tata di Denzel, esta Sr. Boris Dumfries hopi bon, y e mama Marlene, y rumannan.  E ta sigur cu nan lo ta orguyoso di esey.

    El a bisa cu e hecho cu Simon van Rooijen a viaha special pa e acto aki na Aruba, ta algo historico.  E stakeholder tambe ta importante pa gradici, como cu nan lo bay yuda mantene y maneha e cancha aki.  Pues aki e cooperacion ta hunga un rol importante tambe.

   Ministro a menciona tambe ex-Ministro Ramon Lee cu na 2006 tabata e titular di Deporte na Aruba.  El a splica con Lee tabatin un vision pa comberti e cancha di futbol di Frans Figaroa na Noord den un stadion, y esey a logra.  El a menciona nomber di e ruman Dochi Lee tambe, kende tabata tras di e proyecto na Jaburibari.  E area tabata un dump antes (corda riba ‘Comision 2000’).  Ora a puntra Ramon ta kico e kier logra na Jaburibari aki na e dump, y el a bisa cu e kier bin cu un parke social.

   A haci investigacion di e subsuelo cu a recomenda pa yena e tereno cu granit, y despues di analisis a haya luz berde pa cuminza crea e Parke.  Ora cu a cuminza cu construccion, a haya yudanza di Lotto pa Deporte cu a yuda traha e Parke.  Un parke cu 16 aña despues ainda ta wordo bon usa.

   Den e trayectoria aki a negocia tambe cu Johan Cruyff Foundation, y na final riba 6 di November 2006, e cancha a wordo inaugura.

   Ministro Croes a corda tur hoben riba e “CUATRO D” cu bo tin di corda pa nan por bira exitoso den mundo di deporte.  E cuatro D aki ta: (1) Deseo.  (2) Disciplina.  (3) Dedicacion.  (4) Determinacion.