ORANJESTAD (AAN): Recientemente Algemene Rekenkamer Aruba (ARA) a saca un raport riba FASE y riba esaki Prome Minister Evelyn Wever-Croes
a duna di conoce diahuebs mainta den conferencia di prensa cu e raport aki a wordo entrega na Parlamento.
Esey ta e procedura, a remarca. ARA ta duna conseho na Parlamento y Parlamento ta dicidi ki pasonan ta tuma cu e raport.
Gobierno ta haya un copia di e raport. E mandatario a duna di conoce cu e no a studia full e raport ya cu esaki ta basta amplio, pero si el a lesa mesora e resumen y parti di e recomendacionnan.
E minister encarga aworaki pa Asuntonan Social ta Minister Rocco Tjon. Pero den e caso aki, e ex minister encarga Glenbert Croes ta esun cu ta trahando riba esaki, Premier Wever-Croes a splica.
Loke si por bisa ta cu Algemene Rekenkamer ta cuminsa cu splica tambe cu esaki ta un di e pasonan cu gobierno di Aruba a tuma hopi lihe, ora cu e pandemia a aparece. Masha lihe tambe hende a cuminsa keda sin trabao y no semper tabata tin e instituto di bijstand cu por a yuda ya cu bijstand ta limita pa esnan cu tin e nacionalidad hulandes, a remarca.
Na Aruba hopi hende ta biba cu no tin e nacionalidad hulandes y cu hopi di nan lo haya nan den problema . Asina a bin cu e idea pa wak con por a yega na FASE. A yega asina na e solucion pa fin di luna por a pone un idea riba papel como tambe e fondonan disponibel y pa den April 2020 por a cuminsa paga FASE caba na esnan cu tabatin mester.
E mandatario a señala cu e prome luna di FASE tabata April y masha hopi hende a haya FASE y na e momento ey no tabatin 'loonsubsidie' ainda. E subsidio di salario ta un idea cu a bin for di Hulanda y cu a drenta na vigor na Mei, e luna despues.
Wever-Croes a sigui bisa cu e prome luna, FASE ta e unico ayudo cu tabatin.
FASE ta algo hopi grandi cu Aruba a logra haci y ta e unico isla cu a hacie tambe den e forma aki den e region, den Reino y tabata algo hopi necesario, Prome Minister a declara. Y na e momento ey no tabata tin un ley p'e.
