Ministro Endy Croes a tene reunion cu ‘Plataforma 1’ pa atende diferente punto pa Enseñansa den 2024

ORANJESTAD (AAN): Siman pasa Minister di Enseñansa a atende e reunion di e asina yama “Plataforma 1”.

   Plataforma 1 ta consisti di e diez schoolbesturen, minister di Enseñansa, Departamento di Enseñansa y expertonan di e veld, entre otro, Duos. E reunion aki ta tuma luga 1 biaha den seis siman, unda cu ta bini hunto pa trata e temanan comun riba e tereno di enseñansa.

   Minister Endy Croes a duna un splicacion di e Doorlichting Rapport y e 13 recomendacionnan. A repasa kico tur a haci caba y kico lo haci den aña 2024, pidiendo cooperacion di e veld pa duna nan contribucion den esaki pa tin 1 solo linea pa sirbi e interes general.

   Banda di esaki, Minister Endy Croes a ricibi un sorpresa agradabel cu Señora Mabel van Houten, kende ta representante di  Onderwijs, Cultuur en Wetenschap  (OCW) di Hulanda ta 2 dia na Aruba y a forma parti di e reunion aki. Sigur Señora van Houten ta un parti crucial den e relacion cu Hulanda riba e tema di enseñansa.

   Concluyendo, Minister Endy Croes a enfatisa cu e tabata un bon reunion y un bon inicio unda cu Departamento di Enseñansa a duna un presentacion amplio di e avancenan y loke lo sosode encuanto di enseñansa den su totalidad.