Elvis Peasch, antes conoci como ‘Bebe Lechi’...
ORANJESTAD (AAN) Elvis Peasch, antes conoci como e figura “Bebe Lechi”, ta na Aruba pa un otro edicion di e concierto Aruba Uni pa Un Speranza Nobo.
Bebe Lechi a libra su mes di e mundo di adiccion, y awor ta un Pastoor Evangelista, cu su testimonio di recuperacion di adiccion, ta invita comunidad pa reuni den un ambiente di fe, union y speranza, cu atencion special pa personanan cu ta enfrenta adiccion y famianan cu ta atravesa momentonan dificil.
E concierto lo tuma luga dia 30 y 31 di october, cuminsando 7:00 di anochi, riba e tereno di parkeer di e ex Texas Furniture Store na Playa. Entrada ta completamente gratis.
Peasch ta extende un invitacion na henter comunidad di Aruba, sin distincion di religion, color of rasa, pa comparti e dos anochinan dedica na fortifica fe y inspira un speranza nobo.
Durante un entrevista cu DIARIO, el a cita Jeremias 33:3: “Clama na Mi y Mi lo responde bo. Mi lo mustra bo cosnan grandi y maraviyoso cu bo no conoce.” Basa riba e mensahe biblico aki, el a expresa su conviccion cu, ora Aruba acudi na Dios den oracion, tin espacio pa sanacion, restauracion y progreso.
El a reflexiona tambe riba e materialismo creciente den mundo y a enfatisa e importancia di recupera principionan y balornan cu, segun e, a bay perdi. Pa Peasch, un acercamento na Dios ta un paso esencial pa fortifica tanto e individuo como e famia y comunidad.
Cu e mensahe aki, Peasch ta invita tur hende pa asisti y forma parti di dos anochi di encuentro, reflexion y speranza pa Aruba.
