Caribbean Arthritis Foundation a ricibi Profesor Honorario Anthony Woolf hunto cu Parlamentarionan Sr. Gino Goeloe y Sr. Heyliger

ORANJESTAD (AAN): Diasabra mainta Caribbean Arthritis Foundation a ricibi Profesor Honorario Anthony Woolf,

procedente di Inglatera, den presencia di dos parlamentario, es ta Sr. Gino Goeloe, Presidente di e Commission Fiho di Salubridad y Sr. Clifford Heyliger, Presidente di e Commission Fiho di Labor.

            Durante di e encuentro un intercambio di conocimento y experiencia a tuma lugar riba e tereno di salubridad, muy en particular e impacto riba di malesa nan muskoskeletal atritico (RMD) y su efecto nan a largo plaso pa e forsa laboral.

            Es mas, e tendencia actual mundialmente ta cu poblacionnan ta consisti di un porcentahe halto di personanan cu un edad avansa, cu ta conoci como "vergrijzing". Sin embargo esaki tin su consequencianan riba entre otro e maneho di e gastonan medico di un pais y tambe pa Aruba.

            Profesor Honorario Anthony Woolf tin un track record laboral extenso y ehemplar na Inglatera y a ricibi varios distinction internacional pa su colaboracion mundial y su estudionan di investigacion medico. Su persona a traha como un consultant reumatologo prome di ta involvi como director clinico di NHS National Institute of Health Research Clinical Research Network Southwest Peninsula.

            Actualmente Profesor Woolf ta director di e Bone & Joint Research Group y ta involvi den varios initiativa pa consientisa entre otro legisladornan  riba e topico menciona riba un nivel nacional, Europeo y global, entre otro World Health Organization y Union Europeo y a comparti e ultimo desaroyonan, cu pa Aruba siguramente tambe por ta beneficioso asina anticipando riba un maneho di salud y laboral optimal.