Ministro di Turismo kier pa Aruba atrae marcanan renombra y mas Boutique Hotels

ORANJESTAD (AAN): Diahuebs mainta, via di un Webinar organiza pa Aruba Tourism Authority, a suministra un monton di informacion y pone spotlight

riba algun compania nobo cu a cuminza ofrece nan servicionan, desde cu e pandemia a afecta Aruba.

   Tur esey den cuadro di World Tourism Day, cu ta oficialmente Dialuna 27 di September 2021, pero cu ATA a dicidi na festeha riba Diahuebs 23 di September.  E anfitrionnan di e Webinar tabata Mark Benson Denz y Jennifer Richardson

   Un di esnan cu a hiba palabra prome na e Webinar tabata Ministro di Turismo, Dangui Oduber.  El a splica cu “Turismo” nifica tur cos pa Aruba.  Turismo ta loke ta empuha e economia, cu ta crea oportunidad, y ta desaroya e infrastructura, y tur hende ta depende hopi riba e sector aki.  Pesey den cuadro di Dia Mundial di Turismo, el a felicita tur empleado cu ta laborando den e industria, tur partner, y esnan cu ta suministra servicio na e bishitantenan.  Ministro a expresa su gratitud pa tur hende pa cu nan esfuerzo y contribucion pa sostene e industria turistico y economia, pasobra e nifica hopi tambe pa e partnernan.

   E pandemia a haci e trabao aki uno yen di reto y a experiencia pa prome biaha cu e isla tabatin 0 bishitante pa tres luna largo, y a sinti kico bo ta pasa aden ora cu industria turistico no tey.  Ministro ta considera cu desde Juli 2020 cu a habri frontera bek cu tur protocol stipula, pa awor esaki ta un recuperacion exitoso.

   E anfitrion Jennifer Richardson a puntra Ministro, kico e kier logra den e siguiente añanan cu e ta bay ocupa e puesto atrobe di Ministro di Turismo, kico e kier pa su legado bira, esta e logro di mas importante.

   Ministro Oduber aki a contesta, cu ta importante pa logra desaroyo sostenible di turismo.   Oduber kier pa hendenan recorde como e Ministro cu a crea un balanza entre desaroyo y medio ambiente.  E sa cu desaroyo tin di sigui, pero e kier pa e desaroyonan aki ta sostenible pa futuro.  Esey nifica cu tin di keda proteha naturaleza, mester di desaroyonan chikito, estilo di ‘Boutique Hotels’ cu no mas cu 100 camber, y kier atrae marcanan renombra.

   E kier wordo recorda como Ministro cu a atrae marcanan di renombre di e calidadnan mas halto y di nivel pa e isla.

   Pues e ta mustra cu ta bay pone enfoque pa atrae e clientenan di balor grandi, cu tin capacidad pa gasta placa, e turista afluente cu lo impacta e economia sin cu tin e turismo di volumen cu tur hende a costumbra cune den ultimo decadanan.

   Ministro Oduber a bisa cu den turismo tin di enfoca riba e crecimento inclusivo, e beneficionan cu ta wordo crea pa e industria tin di wordo sinti pa tur individuo bibando den sociedad.