Recesion mundial na 2007 a bolbe den memoria di mundo na careda - *Economia mundial den suspenso y bista internacional fiha riba China - *China cu 20 pa 30% di economia mundial ta cera porta pa extranheria
ORANJESTAD(AAN)—Topico mundial ayera tabata China, cu segun cifranan mundial ta e poder economico internacional mundialmente.
Loke a haya tur atencion di mundo ayera, no tabata e hecho cu economia Chines ta gigantesco, pero tambe e cambio di maneho di gobierno di China, e efecto riba otro paisnan y na prome lugar e debenan enorme cu ta parti di economia di China.
Na 2020, Gobierno Chines a tuma medida contra creacion di debe grandi dor di gigantenan economico di e pais.
Di kico ta papia ora atende cu debe cu ta mara na gigantenan economico di e pais, a bini dilanti den e hecho cu un debe di 300 Biyon Dollar ta menasa existencia di Evergrande, un tempo e compania mas grandi di Real Estate na China y actualmente na segundo lugar di companianan grandi pero responsabel pa Dos Porciento di e Produccion Domestico di e pais.
Ariba su mes Real Estate ta representa 7 porciento di economia di China, cu a bira origen di panico mundial ya cu caida di e gigante Evergrande lo por tin resultado serio pa China pero tambe pa economia di cantidad di otro pais.
Mundo ayera a bolbe na e situacion 2007, ora hustamente e mercado di vivienda a percura pa un recesion mundial, cu a afecta Aruba tambe y tabata uno di e motibonan cu e pais a conoce BBO.
Ayera mundialmente sector economico tabata na careda ora e situacion a cuminsa menasa e mercadonan di balor, stockmarket.
Hasta Bitcoin no a scapa di e resultadonan di e problemanan di Evergrande. Den 24 hora Bitcoin a registra un caida di 5.7 porciento mientras otro crypto currency tambe a cay.
E desaroyo na China no por tabata mas inoportuno pa mundo, cu ya ta wordo confronta cu e realidad cu na varios pais grandi, menos hende cu a wordo pensa originalmente ainda a bolbe trabou y a haya empleo despues di e impacto di e Coronavirus nobo.
E situacion serio di Evergrande no a bini como un sorpresa pa mundo cu tabata conoci cu e nivel halto di debe di e compania y varios otro compania importante Chines.
Mientras e fecha di awe tabata acerca, cada rato tabata tin mas motibo pa panico ya cu tabata bira conoci cu Evergrande lo no por a pone e suma di interes enfrente un debe na compania Mericano, di 2 Biyon riba mesa. Otro siman e compania mester paga un interes di 475 Miyon.
Bista ta dirigi riba gobierno di China, cu segun mayoria di expertonan, ta e unico instancia cu por evita caida fatal di Evergrande. Sinembargo, na ciere di DIARIO ainda tur indicacion tabata cu Gobierno Chines ta prefera pa guia Evergrande den e proceso pa bati bancarota y asisti instancianan y personanan cu por bira victima directo di e situacion.
E desaroyonan a trece otro puntonan clave den e maneho actual riba tereno economico di e Gobierno di China dilanti.
Mas y mas e maneho Chines a bira pa cera porta pa entrada di companianan priva di otro pais. Un asunto cu ta afecta e participacion di cantidad di empresa na entre otro Europa.
Sinembargo, ta prefera pa mantene un bon relacion cu China, cu na e momentonan aki manera cifranan ta indica, ta responsabel pa 20 pa 30 porciento di economia mundial.
Awe mundo mester haya un contesta si Gobierno di China lo interveni prome cu e 30 dia di gracia di Evergrande.
Ta den estado di alerta grandi mundo a spera yegada di awe ora e impacto di caida di e gigiante Evergrande, lo bira conoci.
