Ministro di Enseñansa Endy Croes a topa cu studiantenan na Hulanda

ORANJESTAD (AAN); Informacion di Den Haag ta indica cu Minister di Enseñansa y Deporte Endy Croes a tene na Arubahuis un encuentro cu studiantenan.

   Tambe presente na e ocacion aki tabata Minister Plenipotenciario Guillfred Besaril, Anne Marie Proveyer-Groot, directora di Departamento di Enseñansa, Viola Huetger, rector di Universidad di Aruba y un grupo di mentor.

   Minister Croes a habri e encuentro bisando cu elo tene un introduccion cortico, pasobra meta di e encuentro aki ta pa e como mandatario tende di e studiantenan kico ta nan problema of preocupacion.

   Durante di e encuentro diferente tema a bin padilanti, manera e deseo pa regresa Aruba y e debe na DUO cu ta den euro. Algun studiante a duna di conoce cu nan lo keda un periodo Hulanda pa traha pa gana experencia y tambe cuminsa na paga nan fianza na DUO back.

   Un aspecto hopi importante cu a bin dilanti ta e laso cu e studiante tin cu Aruba y kico ta e manernan pa keda stimula esaki. Tambe a papia cu lo mester enfoca mas riba tipo di estudionan cu por duna mas garantia pa un trabao na Aruba. Riba e punto aki a papia tambe pa bin cu un sistema cu e studiante por tin un bista riba e vacaturanan cu tin na Aruba y cu esaki por stimula nan na dicidi pa regresa y traha na Aruba.

   E encuentro tabata hopi informativo y ameno y minister Endy Croes a gradici e studiantenan pa a tuma e tempo pa bin Arubahuis pa asina el a haya un chens pa papia cu nan y tende nan preocupacion.

    E potretnan ta cortesia di Arubahuis.