ORANJESTAD (AAN): Dialuna anochi Minister di Salud Publico sr. Dangui Oduber a a asisti na e lanzamento di e E-learning platform pa cuido.
Un anochi informativo unda HAVA a implementa y desaroya un plataforma di e-learning caminda nan ta ofrece diferente cursonan y conocemento na manera digital pa prestadonan di cuido.
E promenan pa cuminsa usa e Plataforma aki ta e dunadonan di cuido di primera liña na Aruba. Den futuro lo expande pa otro grupo di profesionalnan di cuido.
Minister Oduber ta continua cu e desaroyo y colaboracion cu partnernan pa asina introduci cursonan di cuido pan nos dokternan di cas por mantene e rekisitonan di instituto di calidad y pa registra nan mes den e registro di AruBIG.
Ministerio di salud ta mantene su vision pa reforsa cuido di primera liña na Aruba. Ofreciendo accesibilidad na e plataforma digital aki ta crucial pa mantene e educacion di salubridad alcansabel, efectivo, accesibel y pagabel na Aruba.
Minister sr. Dangui Oduber ta gradici tur e partnernan cu a haci e proyecto aki possibel: AZV (Algemene Ziektekosten Verzekering, HAVA (Huisartsen Vereniging Aruba) y Instituto di Calidad (Kwaliteitsinstituut) pa nan esfuerso y dedicacion na e proyecto di Prelum.
Hunto nos a duna un stap importante den direccion pa un miho cuido di salud na Aruba.
