Segun Parlamentario Ricky Hoek (MEP):
ORANJESTAD (AAN): Parlamentario Ricky Hoek di Fraccion di MEP tabata hopi satisfecho di por a atende e prome Foro Nacional pa Adulto Mayor organisa pa Gobierno di Aruba.
El a referi na dos tereno hopi importante cu ta concerni e adulto mayor y esakinan ta Infrastructura y Transporte. Enfocando riba e parti di infrastructura, e Parlamentario a indica cu ta hopi importante pa gobierno tene esaki na cuenta, pa e adulto mayor, pero tambe pa e personanan cu limitacion.
Tin oportunidadnan pa crece y mehora den esaki den comunidad, a remarca. "Si nos bay den Caya Grandi, si nos bay den tiendanan of cierto viviendanan mes, mi ta kere ta puntonan hopi esencial cu nos tin cu tene cuenta cu ne".
A señala cu anteriormente, den tratamentonan di Presupuesto y otro reunionnan di infrastructura como tambe social, su persona a trece esaki dilanti pa wak unda por traha na mehoracion di infrastructura pa comunidad, principalmente pa esnan cu mester di un extra ayudo den esaki.
Pa loke ta transporte, a bisa cu ta hopi importante pa un adulto mayor cu ta den rolstoel con e por yega na coy bus y con si esey ta su medio di transporte, ken por yud'e pa drenta den e bus, subi den bus. Ta puntonan di atencion cu lo tin cu bay enfoca un poco mas riba dje pa haci e accesibilidad hopi mas facil pa asin'ki e adulto mayor, of e personanan cu limitacion tambe por sali mas facil for di nan cas sin cu tin cu pensa cu nan no por sali pasobra e 'trottoir' ta halto, e bus ta inadecua, no tin hende pa yud'e, etc, Hoek a declara.
Finalmente, Parlamentario Ricky Hoek a expresa cu si kier inclui e personanan aki den comunidad ta importante pa duna nan espacio, duna nan oportunidad y haci e accesibilidad mas facil.
