Ministro Dangui Oduber contento cu Fase 2 di proyecto renoba Palapa na Mangel Halto a cuminza

ORANJESTAD (AAN): Despues di un proceso largo di preparacion y destaho, e Ministerio di Turismo ta contento pa anuncia cu fase 2 di e proyecto “Renobacion di Palapas na Mangel Halto” a oficialmente cuminsa.

E anuncio aki ta enfatisa e compromiso continuo pa mehora y mantene nos area turistico, pero mas importante preservando e naturaleza y belleza di Aruba.

   E proyecto di “Mangel Halto fase 2” ta inclui: (*) Renobacion di tur palapa existente riba e strip na Mangel Halto, asegurando cu e infrastructura natural y funcionalidad ta optimo pa bishitante di e area.  (*) Renobacion di palapa na Rogers Beach, creando uniformidad pa tur beach di Aruba mustra igual. (*) Renobacion di bankinan na Malmok, mehorando e comodidad y accesibilidad na e palapanan.

   E Ministerio di Turismo ta dedica pa aumenta e calidad di nos atraccionnan turistico mientras cu nos ta proteha e ecologia y ta promove sostenibilidad.

   Minister Dangui Oduber ta pidi comunidad y nos bishitantenan pa cuida e areanan aki cu ta worde renoba. Paso hunto nos mester preserva nos herencianan di Aruba pa futuro generacionnan.