Abuso di e Derecho di Libertad di Expresion ta destrui democracia
*E base legal di e Cuarto Poder no ta soporta crimen ni opresion
*Cuadro legal di Aruba ta regla integridad como base di periodismo
ORANJESTAD (AAN) — Con bienestar di un Pueblo mester wordo sirbi? Esaki ta e base filosofico di convivencia humano, cu pa por sirbi e realidad di democracia como Gobierno di Pueblo, ta tene duro na e cuadro di ley di un pais.
Sin leynan fundamental bon regla, democracia no por funciona pasobra ta hustamente e leynan mester preveni abuso y e inclinacion pa trapa riba Pueblo, cu como su ingrediente tin sernan humano.
E hecho cu periodismo ta informa Pueblo y asina ta habri un contacto special entre miembronan di comunidad y periodista, ta haci cu e prome exigencia pa periodismo liber por funciona na un pais, ta conocemento y siguimento di e Cuadro di Ley di un pais, cu ta basa riba e moral di un Pueblo cu ta wordo sirbi.
Con ta pone periodismo den practica ta un conocemento cu ta exigi capacidad pa entre otro acumula informacion y comunica na forma maximo cu un Pueblo.
E conocemento aki mester wordo complementa cu e exigencia pa un periodista conoce y respeta leynan di un pais, pa e por fungi como instrumento di e leynan cu ta keda e unico base legal comunitario pa periodismo por bira comunicador y defensor di Pueblo.
Humildad enfrente e Pueblo cu ta wordo sirbi ta e prome exigencia di un periodista, cu awendia ta forma parti di loke ta yama su mes “cuarto poder”despues di Parlamento, Gobierno y aparato di Husticia.
Integridad ta e palabra mas importante den periodismo cu no ta soporta cu beneficio personal ta stroba un persona di abusa di e comunicacion cu e mester mantene cu Pueblo como periodista.
Corupcion di ningun forma por haci su entrada den periodismo cu mester hustamente expone tur loke por afecta integridad di un Pueblo, cu mester ta bon informa y hamas por a wordo cumpra pa sirbi ningun otro interes cu no ta e ser humano cu ta central.
Na e momento cu periodismo permiti su mes pa bira trampolin social y e hecho cu e ta brinda hende oportunidad pa haya publicidad bira probecho di un periodista, e libertad di un Pueblo ta wordo bendi.
Integridad ta exigencia central di periodismo cu ta un profesion manera tur otro profesion, cu ta exigi estudio pero ta exigi personanan integro cu no ta bende nan placa.
Na e momentonan aki e caso criminal den cual un periodista a wordo sentencia na prison pa motibo di corupcion, tin mes impacto cu casonan di politiconan cu ta wordo sentencia na prison y mester wordo atende di mes forma.
E periodista mester ta sirbidor di e bienestar di Pueblo y caminda e bira sirbidor di su propio bienestar contra leynan y reglanan di un pais, e mester wordo castiga.
Esaki ta e punto di salida di periodismo real como e arma democratico di un Pueblo dirigi pa e formula di integridad.
Na mes momento mester mira con ta bay atende cu e forma cu na demasiado ocasion periodistanan ta mete den bida priva di hende of ta kibra derechonan di privacidad di ciudadanonan cu nan mester sirbi y no uza pa nan bienestar!
