Ministro Cicilia a confirma cu a tira 4 FADs adicional den lama

ORANJESTAD (AAN): Minister di Turismo, Transporte y Labor, mr. Wendrick Cicilia,

a marca un paso importante den e fortalecemento di e sector di pesca local cu e instalacion di cuater Fish Aggregating Devices (FAD’s) adicional den awanan teritorial di Aruba. Cu esaki, Gobierno ta sigui cumpli cu su compromiso pa crea condicionnan mas sigur y sostenibel pa nos piscadonan.

   Fish Aggregating Devices (FAD’s) ta structuranan specialmente diseña pa atrae diferente sorto di pisca. Door di coloca nan mas cerca di costa, e piscadonan por haya acceso na mas pisca sin mester aventura den distancianan mas leu of den awanan stranhero, reduciendo e riesgonan cu nan ta enfrenta riba lama.

   E cuatro FAD’s cu a instala dialuna ta situa na e siguiente localidadnan: (*) Zeewijk. (*) Sero Colorado. (*) Juana Morto. (*) Druif.

   A determina e localidadnan aki den consulta estrecho  cu e comunidad di piscado y otro stakeholdernan relevante, pa asina responde directamente na e necesidadnan y experiencia di esnan cu ta depende di lama pa nan sustento.

  “Nos piscadonan ta un parti esencial di nos comunidad, nos cultura y nos economia. Nan ta sali riba lama tur dia pa pone cuminda riba mesa di hopi famia, y nan siguridad mester ta un prioridad. Cu e instalacion di e FAD aki, nos no solamente ta crea mas oportunidad pa un bon captura, pero nos ta reduci e riesgonan cu nan ta enfrenta, cumpliendo cu nos palabra cu accion concreto,” asina Minister Wendrick Cicilia a expresa.

   E proyecto ta forma parti di un vision mas amplio pa modernisa y fortalece e sector di pesca na Aruba, mientras ta promove practicanan di piscamento mas sigur y sostenibel. E iniciativa ta refleha tambe con ta inverti fondonan deriva di turismo, cu apoyo di Aruba Tourism Authority (ATA), den proyectonan cu ta beneficia directamente comunidad local.

   Minister Wendrick Cicilia a enfatisa cu tabatin hopi persona tras di e parti operacional y a gradici Capitan Aito, Alex Mansur y Santa Rosa cu tambe tabata presente pa e instalacion di FADs.

   Minister Cicilia a reafirma cu Gabinete AVP – Futuro lo sigui traha hunto cu e comunidad di piscado pa sigui identifica oportunidadnan cu contribui na un sector di pesca mas fuerte, mas resiliente y cu mas siguridad pa tur esnan cu ta depende di lama pa nan futuro.