Señora Yhoelly Willems:
ORANJESTAD (AAN): Ya seis luna a pasa caba despues di e accidente cruel debi na un Hit & Run cu a tuma luga na januari ultimo dilanti di Renaissance Mall. E chauffeur causante di e accidente fatal aki ta cera na KIA wardando investigacionnan keda cla. Segun e famia di e dama sospechoso C.F.D. a declara na prensa dialuna ultimo, nan ta busca husticia y trato husto y humano pa nan yiu muhe kende pa seis luna ta cera y a wordo nenga derecho di tin un abogado. Mama di e sospechoso a expresa tambe cu su yiu muhe su welo ta den hospital hopi malo mientras cu e ta sumamente pega na e welo sin cu e por ta banda di dje na e momentonan aki.
Yiunan di victimanan cu a fayece cruelmente dia 4 di januari tambe a bin dilanti diamars mainta pa trece nan puntonan dilanti riba e declaracionnan di famia di e chauffeur culpable di e accidente cu a kita bida di nan mayornan.
Yiu muhe di e victimanan, señora Yhoelly Willems, na prome luga a duna di conoce cu e anochi ey e tambe tawata un victima y sobreviviente di e caso di Hit & Run aki, el a keda herida y mester a bay Eerste Hulp. Ambos e, mientras e tawata na estado e tempo ey caba sin cu e tawata sa, y su casa a scapa di wordo alcansa mientras cu su mayornan no a core cu e mesun suerte.
Mientres cu famia di e sospecho ta pidi derecho humano y husticia sano pa nan yiu muhe cu a causo morto di dos persona, Willems ta enfatisa cu esaki su famia tambe kier exigi pa su sernan keri, su mama y su tata cu a ser ranca di e bida aki su dilanti. Door di e iresponsabilidad di C.F.D. di bebe y stuur bou influencia, dos persona a perde nan bida inocentemente. E mes a keda herida y hunto cu su casa a keda cu un trauma cu pa resto di nan bida nan mester biba cu ne. Esaki, el a expresa, no ta husto.
“Aki no ta trata di ken tin mas trauma cu otro of ken tin mas problema psicologico cu otro. Mi punto ta cu C. mester ta cera na KIA pasobra el a ocaciona un accidente cu a kita bida di mi sernan keri”, el a expresa.
Señora Willems ta haci un suplica na Aruba henter, pa ora ta bebe y no ta den condicion pa maneha, busca un persona responsabel pa stuur pa evita accidentenan fatal asina, cu ta laga famianan den trauma pa resto di nan bida.
“Mi ta spera y mi ta confia cu husticia lo haci su trabou”, señora Willems a enfatisa.
