Ministro Arends a keda impresiona cu e premio cu Monumentenfonds y Uncle Louis Store a ricibi

ORANJESTAD (AAN): Ministro Ursell Arends tabata hopi contento ora cu a bira conoci cu e Premio Van Vollenhoven

a wordo duna na Monumentenfonds di Aruba, specialmente pa e monumento di Uncle Louis Store na San Nicolas.

   Ministro hunto cu Gobernador tabata presente pa mira e anuncio oficial via Teleconference for di Hulanda.

   El a bisa cu net riba Dia di Mama Tera, e por a presencia e Teleconference pa mira con e Premio Van Vollenhoven a wordo entrega na Monumentenfonds y tambe Departamento di DNM.

   Ministro ta impresiona cu esaki ta prome biaha cu e Premio Pieter van Vollenhoven ta wordo entrega na un monumento pafo di Hulanda, y esaki tin un nificacion special pa Aruba.

   Como cu el a wordo duna riba Dia di Mama Tera, e ta bira special, mirando tur aspecto di naturaleza y aspecto di e desaroyo sostenible cu a wordo ateni na dje ora di e proceso di restaura e edificio.

   Ministro Arends ta positivo, cu esaki ta e prome premio, y cu den futuro mas monumento por haya Premio aki.

   E ta admira e inversionnan haci pa Monumentenfonds, y cu nan ta trabao duro!  Si sigui inverti den otro monumentonan, sigur esaki lo duna e cultura bibo cu kier mira na e pais sigui crece y tuma lugar.

   “Mi ta manda un palabra di pabien na tanto Stichting Monumentenfonds, na Departamento di DNM, pa e bunita logro aki,” Ministro a bisa.

   Uncle Louis Store, e monumento di Uncle Louis Store ta un edificio construi den añanan cincuenta, diseña pa arkitecto Jan Nagel y construi den un estilo di ‘Nieuw Bouwen’ tabata pa hopi aña edificio di Uncle Louis Store cu tabata un tienda di bende tela y accesorionan di moda. Na principio di añanan nobenta gobierno a cumpra e edificio y esaki a bira oficina di Aduana.

   Despues cu pa basta aña e edificio a keda bashi, Stichting Monumentenfonds Aruba a cumpra e edificio cual ta un monumento proteha y asina a restaura esaki completamente den su forma original. Locual ta haci esaki un proyecto special ta cu e ta e prome monumento cual ta inclui panelnan solar, un sistema di reciclahe di awa y un green wall haciendo esaki un di e monumentonan mas sostenibel na Aruba.

   Actualmente e edificio ta e oficina di Directie Natuur en Milieu cual ta haci e edificio accesibel tambe pa publico un biaha mas.  Cu e proyecto aki nos por garantisa cu futuro generacionnan tambe lo conoce Uncle Louis Store y su historia.