ORANJESTAD (AAN) – Parlamentario di fraccion di MEP, Alvin Molina, tabata presente durante e conferencia di prensa di presentacion di e Master Plan Seroe Colorado,
cu ta integra e proyectonan di renovacion di Baby Beach y Rodgers Beach, cu tabata e puntonan di enfoke.
El a bisa cu desaroyonan den Baby Beach, cu ta drenta den su di dos fase, ta aspectonan conoci caba, pero pa loke ta Rodgers Beach tin desaroyonan nobo.
Ta wordo papia di haci e beach mas amplio, trece sombra pa e ecosistema, etc. E ta haya importante pa tur stakeholders ta envolvi for di mas trempan posible, y den e caso aki DOW a haci un tremendo trabao, hunto cu Ministerio di Turismo.
Pues, e tabata un presentacion di locual tin riba mesa awo, y ta hopi bon cu nan ta habri pa haya input di otro stakeholders.
Molina a acentua cu den e caso aki SNBA tin un rol grandi como representante di e comerciantenan den e area. Ademas tin DNM y Parke Nacional cu tambe ta presente. El a reitera cu ta hopi importante pa e stakeholders duna di nan parti, for di nan experticio loke ta importante pa tene cuenta cune, ora di desaroya e proyectonan aki.
Parlamentario Molina a señala cu mester wak e desaroyo di beach den un area asina chikito, for di un ‘holistic approach’.
El a bisa cu esaki ta un bon inicio. Trabaonan ta wordo haci pariba caba, for di e ministerionan concerni, pero pa e sostenibilidad y exito na termino largo di e proyecto aki, mester tene cuenta cu tur e stakeholders y e comerciantenan cu tin caba den e area. E comerciantenan no tabata tey diahuebs, pero segun e parlamentario nan lo bin na beurt tambe pa duna nan input.
Un aspecto importante pa e desaroyo di e distrito, cual ta e meta principal, ta seguridad. Seguridad ta e motibo mas importante pakico turistanan ta bin Aruba en general. “Si nos kier pa turistanan bishita San Nicolas, mester zorg pa seguridad ta up to date. Y pa nos trece seguridad nos mester drecha e comunidad, pasobra solamente pone mas polis riba caya, of cera mas hende den KIA, no ta bay aumenta e seguridad na Aruba” parlamentario Alvin Molina a remarca.
El a subraya cu mester bay den e barionan mas deep y zorg pa nan ta na ordo; cu e muchanan ta bay scol, cu e famianan nan forza financiero ta na ordo, cu e area ta bunita, cu tin actividadnan pa e muchanan positivo. “E ora ey numa por bisa cu e desaroyo di San Nicolas por tin un chens pa logra di berdad”, e parlamentario a señala.
El a agrega cu solamente enfoca riba un area, of riba turismo sin tene cuenta cu tur otro aspecto rond di dje, a lo largo e lo no bay resulta.
