Ministro a ricibi bishita di President nobo di CAft

ORANJESTAD (AAN): Siman pasa diabierna Minister Maduro di Finansa a ricibi bishita y a reuni pa promer bes cu e Presidente nobo di CAft, señora Lidewijde Ongeringen hunto cu demas miembro di e Colegio y Secretariado di CAft.

   Durante e reunion a trata varios topico, entre nan, Presupuesto 2023, cuentanan anual, refinanciamento di debe cu su gasto di interes, 'compliance' riba tereno di impuesto y inversion. CAft ta satisfecho pa mira cu Presupuesto 2023 lo conoce un surplus y a indica cu di e manera aki Aruba ta cumpli cu e norma financiero stipula den e Protocol di aña 2018.

   Sinembargo nan ta wak algun risico, pa cual nan ta pidi atencion. Minister Maduro a repasa e puntonan di agenda y a brinda un splicacion di kico tur ta worde haci pa adresa e puntonan di preocupacion cu CAft a trece dilanti.

   Presupuesto 2023 cu 'Voorjaarsnota': Pa Presupuesto 2023, por menciona cu ta trahando riba un 'Voorjaarsnota' den cual pa promer bes na Aruba, Parlamento lo worde informa na comienso di aña presupuestario di cambionan den maneho cu ta hiba na cambio den e cifranan presenta den presupuesto.

   Te cu awo a traha cu 'Najaarsnota' so y awo cu e cambio aki, Parlamento na un forma adelanta ta haya un bista riba cambionan cu ta necesario, locual ta fortifica nan control. E 'Voorjaarsnota' ta premira pa keda presenta na fin di e promer kwartaal.

  Cuentanan Anual 2019 y 2020: Na e momentonan aki trabaonan ta worde haci pa por finalisa e Cuentanan Anual di Pais Aruba pa aña 2019 y 2020. Tin un retraso grandi a tuma luga debi na trabaonan prioritario cu mester a tuma luga na Departamento di Finansa pa atende cu e pandemia.

   Gobierno a laga algun trabao tuma luga cu experticio di sector priva, y eynan tambe a surgi retraso cual a trece mas tardansa. Ta premira cu den e promer kwartaal lo keda cla cu Cuenta Anual 2019 y den segundo kwartaal esun di aña 2020 lo por ta cla.

   Refinanciamento debe: Pa locual ta trata e refinanciamento di e debe di 5,8 biyon Florin di nos Pais, tin dos punto di atencion, e condicionnan di pago pa e debe di 916 miyon Florin cu Hulanda, y e refinanciamento di e debe comercial di Aruba. Den luna di februari lo cuminsa e reunionnan entre Aruba y Hulanda pa asina por stipula e condicionnan pa e pago di e 916 miyon Florin cu Aruba a fia di Hulanda pa sobrepasa e pandemia.

   Den e ronda aki ta di sumo importancia tambe pa papia riba e refinanciamento di e debenan comercial di Aruba, ya cu den corto plazo mas di mita di e debenan aki mester keda paga. A base di e capacidad di pago di Aruba lo mester yega na palabracion pa paga e debe back y hunto cune e peso di e interes den e decada nos dilanti.

   Impuesto y 'compliance': Di e Plan di Impuesto 2023 y 'compliance,' por bisa cu esaki a drenta na vigor y trabaonan ta worde haci pa fin di februari por tin un concepto di ley pa introduci BBO na frontera. Esaki ta premira di bay yuda grandemente riba e tereno di 'compliance.'

   Banda di esaki den e promer kwartaal Aruba lo haya yudansa di IMF/CARTAC pa asina adresa 'compliance' den, entre otro, e sector di turismo na nos Pais.

   Inversion: Grado di inversion na Aruba door di Gobierno ta keda un problema di capacidad pa por 'commit' e fondonan disponibel na e proyectonan di inversion cu ta keda selecta via un sistema di aprobacion inparcial pa Departamento Economico.

   Bao di e capa di e trabaonan pa por cumpli cu Landspakket tema A, ta trahando pa por delinea un cuadro multi-annual pa inversionnan necesario pa Aruba.

   Bon comunicacion ta esencial: Na final di reunion Minister Maduro a enfatisa cu e bon comunicacion entre e Secretariado di CAft y Departamento di Finansa ta esencial pa asina nan por keda bon na altura di e trabaonan cu ta worde haci pa por mehora e maneho financiero di nos Pais.

   Pa e motibo aki na Aruba ta purba canalisa tur informacion den direccion di CAft mas tanto cu ta posibel fo'i Departamento di Finansa.