ORANJESTAD (AAN): President y CEO di AHATA, Tisa LaSorte, orguyosamente a anuncia na su miembronan cu na 2023 ta introduci e 'AHATA Impact Award'.
Meta di e programa di premiacion ta pa reconoce esfuerso di companianan responsabel, miembro di AHATA, cu ta invertiendo den y mehorando nos comunidad.
Lo tin premio separa den cuater pilar clave di sostenibilidad: (*) Caridad (donacion financiero of trabao boluntario). (*) Promocion cultural. (*) Proteccion di nos medio ambiente. (*) Contribucion na calidad di bida di empleado.
AHATA a colabora cu cinco representante di organizacionnan respeta na Aruba pa desaroya e rekesitionan pa e premionan y criterio pa evaluacion. E mesun cinco persona lo funciona como e team di hurado pa evalua e aplicacionnan y skohe cuater ganador.
E panelistanan di hurado ta Daniel Tecklenborg (Director di CEDE Aruba), Franciele Laclé (Consultor di Desaroyo Sostenibel), Ray-Anne Hernandez (Directora di UNOCA), Jan Noordzij (Gerente di “Advance Human Resources Services”), Rosabelle Illes, PHD (Psicologo y Profesora asistente na Universidad di Aruba).
Durante un evento special na Juni, lo anuncia e cuater ganadornan di AHATA Impact Award 2023.
Cu e programa di premiacion nobo, AHATA ta apoya empresanan sostenibel y ta spera di inspira mas compania pa inverti den e pilarnan di sostenibilidad cu ta sigura un bon futuro pa nos isla.
