Ministro a reuni cu mando di Guardacosta di Caribe Hulandes den cuadro di seguridad na frontera

ORANJESTAD (AAN): Recientemente, Minister di Husticia y Asuntonan Social  Rocco Tjon a reuni cu e director interino di Guardacosta di Caribe Hulandes, Sr. Eugene Middelhof , den cuadro di siguridad na nos fronteranan.

   Manera ta conoci, algun siman atras a elabora tocante e cooperacion estrecho cu tin actualmente entre e diferente departamentonan di husticia, cu ta traha hunto pa asina mantene nos fronteranan hermeticamente sera.

   Durante e reunion aki a logra combersa cu Sr. Middelhof pa asina papia tocante e parti di e “plan van aanpak grenz toezicht”, cual a worde scribi den cooperacion cu Hulanda, cual Hulanda a aproba caba den cuadro di e “landenpakket”. Un punto hopi importante ta cu Hulanda a aloca cuater miyon Euro pa e ehecucion di e plan aki y manera ta conoci, ya un parti di e plan aki ta den pleno ehecucion, mirando cu mas y mas e cooperacion entre e diferente departamentonan ta mehorando. Otro punto clave ta e radarkamer, cual actualmente ta worde ocupa 24/7, danki na e bon colaboracion entre e departamentonan cu ta pone nan personal disponibel pa cu esaki, di cual Guardacosta di Caribe Hulandes ta un partner clave.

   Por ultimo, e mandatario a enfatisa cu durante e reunion aki a delinea diferente proceso pa asina garantisa cu e cooperacion entre e departamentonan aki por ta uno  mas solido. Pa e motibo aki ta reuni structuralmente cu cada departamento cu ta forma parti di e ‘strategisch grensoverleg’, cual ta un di diferente esfuersonan cu ta worde haci pa percura cu nos fronteranan ta keda hermaticamente sera.