Ministro a mustra cu 2024 lo ‘recap’ pista di International Raceway Palo Marga

ORANJESTAD (AAN): Recientemente, Minister di Enseñansa y Deporte Endy Croes tabata presente na Palo Marga International Raceway Park, unda cu tabatin careda di One Cool Summer Nationals 2023 tumando luga.

   Tabatin un publico grandi presente cu a disfruta di cada careda riba e pista di Palo Marga. Durante e evento aki, organizadonan a reconoce 3 baluarte cu a traha hopi duro pa e deporte di drag race na Aruba, esta Sr. Manuel da Silva, Señora Miriam Wouters y Señora Kedy Koolman.

   Minister Endy Croes tabatin e honor pa haci entrega di e reconocemento na e baluartenan di e deporte di drag race. Presente tambe na e ocasion aki, tabata e legendario Sr. Henny Leo kende a hiba palabra durante e ceremonia. E aña aki Palo Marga International Raceway Park a cumpli 40 aña di existencia.

   Minister Endy Croes a indica cu a logra drecha 26 palo di luz na Palo Marga y a compromete cu pa aña 2024 lo “recap” e pista completamente pa asina cumpli cu standard internacional.

   Pa finalisa, Minister Endy Croes a desea tur coredo hopi exito. Alavez a felicita organisadornan y One Cool Summer Nationals 2023 cu un tremendo y exitoso evento