ORANJESTAD (AAN): Minister di Cultura, Xiomara Maduro, tabata un di e invitadonan di Artisa pa presencia e develamento di e mural di e artista local Paul Wong.
E atardi aki a cuminsa cu un tour duna door di Tito Bolivar di ArtisA, caminda cu a presencia un obra di mosaic na comienso di caya grandi di Omaira Silva. E obra aki, un octopus completamente traha di mosaic, ta un bunita adicion na e cayanan di San Nicolaas.
Despues di esaki e tour a sigui pa e siguiente stop cu tabata un mural 3D di e nomber di Aruba, traha pa e artista local Robert Solognier, miho conoci como Ice One. E obra aki ta un obra cu ta cautiva tur esnan cu pasa mir’e mirando cu e ta consisti di diferente componentenan cu ta forma nos Pais, manera San Nicolaas store, Kapel di Alto Vista y e Lighthouse pa menciona algun. Sin duda un mural cu ta duna realse na locual ta haci nos Pais uno unico.
Finalmente, e tour a caba cu e develamento di e mural di Paul Wong titula ‘Mi forsa’ cu ta e escudo di Aruba traha den forma cu e leon ta haya un bida, cu e palabranan ‘un tin nada pa kibre’, poniendo enfasis riba e forsa di nos Pais.
