Diadomingo awor
ORANJESTAD (AAN): San Nicolas Business Association (SNBA) ta extende un invitacion na henter e comunidad di Aruba pa su evento di clausura di accion di firma. E evento aki lo tuma luga diadomingo awor 24 September 2023 cuminsando for di 4:00 pm te cu 11:00 pm den parkinglot di Arubus San Nicolas.
Como un organizacion cu ta enfoca y dedica riba e desaroyo y crecemento di e comunidad di San Nicolas, SNBA a organiza un campaña di colecta firma cu a cuminsa 2 luna pasa pa sostene e proyecto di Hotel Secrets cu lo brinda un desaroyo di transformacion pa e distrito di San Nicolas. E evento di clausura dia 24 September lo ta e gran final di e campaña aki y un oportunidad pa henter e comunidad uni pa un cambio pa San Nicolas.
E evento lo ser transmiti en bibo y bandanan musical grandi manera Oreo, Tsunami, Buleria y e banda di momento Shine Music lo ta presente pa trece ambiente. Lo tin tentnan cu variedad di cuminda, ofreciendo un experiencia culinario tipico y hopi delicioso, di San Nicolas.
Pa tur esnan cu no a haya chens ainda pa pasa firma, lo tin representantenan di SNBA cu lo ta disponibel pa colecta firma y mustra nan sosten. Ademas, representante(nan) di Secrets Hotel tambe lo ta presente na e evento y lo duna un presentacion chikito ofreciendo informacion valioso riba e desaroyo di e proyecto di hotel y su contribucion significativo na e comunidad. E expectativa ta halto, ya cu e presencia di e hotel ta spera di habri porta pa oportunidadnan y actividadnan comercial, creando cuponan nobo di trabao pa henter e comunidad di San Nicolas y trece alivio na esnan cu ta tuma 4 ora tur dia pa yega trabao y bolbe cas.
E proyecto aki no solamente tin e potencial pa trece un cambio significativo pa negoshinan y esnan cu ta biba den e area, pero tambe lo contribui na e economia di henter e pais, haciendo e causa uno cu ta bale la pena pa apoya.
SNBA ta extende un invitacion cordial na tur miembro di comunidad pa asisti na e evento aki, firma y sostene proyecto di Secrets Hotel, y disfruta di un atardi memorabel. E evento aki ta un oportunidad pa demostra union y solidaridad den e districto di San Nicolas, cu lo marca e comienso pa un futuro nobo y prometedor pa e comunidad y negoshinan di San Nicolas.
